Umuriro ushobora kwaka hagati ya Messi na C. Ronaldo

Ni nyuma y’amagambo yatangajwe n’umuyobozi w’ikipe ya FC Barcelona, Josep Vives agendeye ku byo C. Ronaldo yavuze ubwo yegukanaga Ballon d’Or ye ya gatanu by’umwihariko avuga ko ari we mukinnyi wa mbere ku isi ibyo uyu muyobozi we abona nko kwishongora ndetse avuga ko umukinnyi wa mbere ku isi ari Lionel Messi wa Fc Barcelona wenyine.

Lionel Messi na Cristiano Ronaldo ni abakinnyi badashidikanywaho ko bombi ari beza cyane ko bamaze no gufata imitima ya benshi mu bikundira umupira w’amaguru muri iki gihe. Iyo umuntu ashatse kugira umwe muri aba bakinnyi ashyira imbere kurusha undi, abafana b’undi barahaguruka bavuga ko uwo bafana ari we mwiza kuruta ibintu bikurura impaka zikomeye.

PNG - 1006.5 kb
C. Ronaldo na Lionel Messi abantu badakunze kuvugaho rumwe


N’ubundi nyuma y’aho umusore Cristiano Ronaldo ukinira ikipe ya Real Madrid yegukaniye Ballon d’Or ye ya gatanu, hakomeje gucicikana inkuru zigereranya uyu mukinnyi na Lionel Messi wa Fc Barcelona ariko hakabura gica cyane ko buri wese afite uwo afite ku mutima kuruta undi.

Ubwo Ronaldo yatwaraga Ballon d’Or ye ya 5 yatangaje ko ariwe mukinnyi wa mbere ku isi ndetse abona nta wundi umurusha kuko n’ibihembo atwara bibyivugira atabihererwa ubusa.

Umuvugizi wa Fc Barcelona Josep Vives yatangaje ko aya magambo ya Ronaldo ari ubwiyemezi kuko umukinnyi wa mbere mu mateka y’isi ari Messi.

Josep Vives yagize ati " Sinitaye ku magambo Ronaldo yatangaje avuga ko ariwe mukinnyi wa mbere kuko aribeshya cyane umukinnyi wa mbere aba hano i Camp Nou ni Lionel Messi ."

Icyo bamwe bategereje ni ukureba niba n’abayobozi ba Real Madrid barasubiza uyu muyobozi wa Fc Barcelona nabo bakavuga ko umukinnyi wa mbere ari Ronaldo nk’uko bakunze guterana amagambo bapfa aba bakinnyi.

Ibi bije mu gihe ikipe ya Fc Barcelona izacakirana na Chelsea muri 1/16 cy’irangiza cy’igikombe cya champions league mu gihe Real Madrid ifite akazi katoroshye ko kwisobanura n’ikipe ya Paris Saint Germain yo mu Bufaransa.

Ikipe ya FC Barcelona kandi kugeza ubu ku rutonde rw’agateganyo rwa LaLiga Santander ihagaze ku mwanya wa mbere n’amanota 39 ikaba ikurikiwe na Valencia ifite amanota 34 mu gihe mukeba w’ibihe byose Real Madrid ihagaze ku mwanya wa 4 n’amanota 31.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo