Tottenham yakoreye ibitangaza kuri Ajax, umutoza Pochettino arira nk’umwana

Ni nyuma yuko Tottenham nayo ikoze ibikomeye igasanga Liverpool ku mukino wa nyuma wa Champions League y’uyu mwaka.

Ikiruseho ni uko yabikoreye kwa Ajax Amsterdam ikayitsindira iwayo bitatu kuri bibiri maze igasanga Liverpool ku mukino wa nyuma wa UEFA Champions League.

Tottenham yaje igowe no kwishyura igitego yatsindiwe iwayo mu mukino ubanza, ariko byabaye bibi kurushaho kuko igice cya mbere cyarangiye imaze gutsindwa ibindi bibiri ku kibuga Johan Cruyff Arena.

Lucas Moura afashijwe na bagenzi be yatsinze ibitego bibiri mu minota yegeranye - uwa 55 n’uwa 59 - hamwe n’icy’intsinzi ku munota wa nyuma mu y’inyongera. Tottenham ikomeza ityo kubera gutsinda ibitego byinshi hanze.

Umutoza Pochettino yarize nk’umwana

Mauricio Pochettino, umugabo usanzwe ugaragaza yeruye amarangamutima ye, ifirimbi ya nyuma ivuze yavudukanye ibyishimo ajya mu kibuga yisenura ku byatsi maze yubika umutwe hasi ararira cyane mu byishimo.

Nyuma yabashije kuvuga ati: "Abakinnyi banjye ni intwari, uriya we [Lucas Moura] yabaye intwari iziruta. Igice cya kabiri bari bashimishije. Urakoze mupira w’amaguru. Ibyishimo nk’ibi ntibishoboka kereka mu mupira w’amaguru gusa. Ibi kubisobanura mu magambo birakomeye".

Pochettino w’imyaka 47 y’amavuko umaze imyaka itanu atoza Tottenham, mu marira yakomeje avuga ko bagiye kwitegura umukino wa shampiyona ku cyumweru ndetse na Liverpool ku mukino wa nyuma w’iri rushanwa.

PNG - 479.8 kb
Tottenham igeze ku mukino wa nyuma wa Champions League bwa mbere guhera mu mwaka wa 1984 ubwo yegukanaga igikombe itsinze Anderlecht kuri za Penaliti


Harry Kane, kapiteni wa Tottenham utari gukina kubera imvune, yavuze ko ntako bisa kwigaranzura ugatahana intsinzi.

Ko ari mu byishimo bikomeye mbere na mbere nk’umufana ubundi nanone nk’umukinnyi wa Tottenham.

Avuga ko ari gukira vuba imvune ye, akaba yizeye kuzagaruka ku mukino wa nyuma.

Yagize ati: "Twatsinze Man City, dutsinze na Ajax, ngomba gutangira imyitozo irushije iya mbere nkiyerekana ku gisigaye imbere".

’Kubyakira birakomeye’-Umutoza wa Ajax

Erik ten Hag utoza Ajax ati: "Twakozaga intoki ku ntsinzi kandi twari tuyikwiriye, ariko ririya segonda rya nyuma..."

"Mu kiruhuko nabwiye abakinnyi ko bitararangira, nabibonaga ku muhate w’abakinnyi ba Tottenham. Bari bakibona ko bishoboka".

Uyu mutoza yavuze ko bagize urugendo rwiza muri uyu mwaka w’imikino kugera hano, ko ibyabaye mu ijoro ryo ku wa gatatu ntawe yabiryoza. Ati: "Gusa kubyakira birakomeye".

Mu mwaka wa 2008 ku kibuga Luzhniki mu Burusiya, nibwo amakipe abiri yo mu Bwongereza, Chelsea na Manchester United, aheruka guhurira ku mukino wa nyuma w’iri rushanwa ry’amakipe yabaye aya mbere iwayo ku mugabane w’Uburayi.

Liverpool na Tottenham nazo ku itariki ya mbere y’ukwezi gutaha kwa gatandatu zizahurira i Madrid ku kibuga Wanda Metropolitano saa mbiri z’ijoro i Cyendajuru ya Giheke i Rusizi mu Rwanda n’i Cendajuru ya Cankuzo mu Burundi.

PNG - 357 kb
Lucas Moura witera mu bicu yatsinze ibitego bitatu bya Tottenham mu gice cya kabiri cy’umukino, ayifasha kugera ku mukino wa nyuma wa Champions League

PNG - 1 Mb
Harry Kane uri mu mvune n’umutoza we Mauricio Pachettino bishimira intsinzi
PNG - 1.1 Mb
Tottenham nayo yakoze ibikomeye isanga Liverpool ku mukino wa nyuma wa Champions League

@Umubavu.com





Tanga igitekerezo kuri iyi nkuru



Igitekerezo