Tanzaniya: Perezida Magufuli yahembye isambu buri mukinnyi wa Taifa Stars yabonye itike ya CAN 2019

Perezida John Magufuli wa Tanzaniya yasezeranyije guha isambu buri mukinnyi mu bagize ikipe y’igihugu y’umupira w’amaguru nk’igihembo ku guhesha itike iki gihugu yo kwitabira imikino y’igikombe cya Afurika nyuma y’imyaka 39 yari ishize kitayitabira.

Ni imikino iteganyijwe kubera mu Misiri kuva ku itariki ya 21 y’ukwa Gatandatu kugera ku ya 19 y’ukwezi kwa karindwi muri uyu mwaka wa 2019.

Bwana Magufuli yakiriye abakinnyi b’ikipe y’igihugu mu rugo iwe mu mujyi wa Dar es Salaam, nyuma yo kubona itike banyagiye Uganda ibitego 3-0 mu mukino wabaye ku cyumweru gishize.

Bwana Magufuli yagize ati: "Kubera umurimo mwiza mwakoze mu guhesha ishema Tanzaniya mubona itike yo kwitabira imikino y’igikombe cya Afurika cy’ibihugu izabera mu Misiri, buri mukinnyi azahabwa isambu [mu mujyi wa] i Dodoma [umujyi w’icyicaro cy’ubutegetsi bw’iki gihugu]".

Yongeyeho ati: "Ndemeza ko abakinnyi bacu bazitwara neza kurushaho i Cairo [mu murwa mukuru wa Misiri], kandi muzarenzeho mutsindire n’igikombe".

Nubwo Tanzaniya yari yatsinze uwo mukino biyoroheye, abafana n’abakinnyi b’ikipe y’igihugu ya Tanzaniya bari bagikurikirana n’umutima uhagaze umukino waberaga i Praia mu murwa mukuru wa Cap-Vert aho, iyo Lesotho iza kuwutsinda inzozi zabo zo kubona itike zari kuba zirangiriye aho.

Muri iryo tsinda L, Lesotho yanganyije na Cap-Vert 0-0, bihita bifasha Tanzaniya kubona itike nk’ikipe ya kabiri mu itsinda, ibona itike hamwe na Uganda yarangije ari iya mbere.

Lesotho na Cap-Vert byo byarasezerewe

Ikinyamakuru The Citizen kitegamiye kuri Leta ya Tanzaniya gitangaza ko Bwana Magufuli yanahaye impano y’agera hafi ku bihumbi 426 by’amadolari ya Amerika ikipe y’igihugu y’abari munsi y’imyaka 17 y’amavuko mu kuyifasha kwitegura imikino y’igikombe cya Afurika yo mu cyiciro cyabo.

Tombora y’uburyo amakipe azaba agabanyije mu matsinda ya CAN 2019 izaba guhera tariki ya 21 Kamena kugeza ku ya 19 Nyakanga, iteganyijwe tariki ya 12 Mata 2019 i Cairo.

PNG - 879.3 kb
Tanzania yaherukaga mu gikombe cya Afurika mu 1980, yabonye itike ya CAN 2019
PNG - 530.6 kb
Perezida John Pombe Magufuli yakiriye Taifa Stars mu biro bye
PNG - 442.5 kb
Perezida Magufuli yavuze ko ashaka ko ikipe y’igihugu y’umupira w’amaguru itwara igikombe mu mikino ya Afurika yimirije

@Umubavu.com





Tanga igitekerezo kuri iyi nkuru



Igitekerezo