TAS yangiye CAF gusubiramo umukino wa nyuma wa CAF Champions

Mu gihe Impuzamashyirahamwe y’umupira w’amaguru muri Afurika (CAF), yari yafashe icyemezo cyo kuzasubiramo umukino wa nyuma wa CAF Champions League 2018/19, urukiko rwa Siporo (TAS) rwateye utwatsi iki cyemezo, bivuze ko bidasubirwaho Espérance de Tunis igumana igikombe.

Nyuma y’umukino wabaye mu mpera za Gicurasi tariki ya 5 Kamena, CAF yasabye Espérance de Tunis ko isubiza igikombe yahawe, bityo hakazabaho undi mukino ku kibuga kihariye.

Espérance de Tunis yo muri Tunisia yegukanye igikombe cy’irushanwa rihuza amakipe yabaye aya mbere ku mugabane wa Afurika, nyuma y’uko Wydad Casablanca yanze gusubira mu kibuga guhera ku munota wa 60 w’umukino kuko ikoranabuhanga rya VAR ritabashije gukemura ikibazo cy’igitego cyo kwishyura yari itsinze, umusifuzi akacyanga.

Iyi kipe yo muri Tunisia yari iyoboye umukino wo kwishyura ku gitego 1-0 cya Youcef Belaili ku munota wa 41 ndetse yari imbere n’ibitego 2-1 mu mikino yombi ubwo umukino wazagamo kidobya.

Wydad Casablanca yibwiraga ko ibonye igitego cyo kwishyura ku munota wa 59, gitsinzwe na Walid el Karti, umusifuzi aracyanga.

Abakinnyi b’iyi kipe banze gusubira mu kibuga maze nyuma y’igihe kigera hafi ku masaha abiri, umusifuzi asoza umukino, Espérance de Tunis ihabwa igikombe.

Tariki ya 14 Kamena, Espérance yandikiye TAS iyisaba kuyishyuriza CAF amafaranga agera kuri Miliyoni $2.5 yatsindiye kuri uyu mukino wa nyuma.

Tariki ya 17 Kamena, Wydad Casablanca na yo yavuze ko idashobora gusubiramo uyu mukino wa nyuma kuko yibwe, isaba ko Espérance yaterwa mpaga, yo igahabwa igikombe.

TAS yatangaje umwanzuro wayo kuri uyu wa Gatatu, yemeza ko atari ngombwa ko uyu mukino wa nyuma wazasubirwamo.

TAS yemeje ko Espérance de Tunis ari yo yegukanye Igikombe cya CAF Champions League 2018/19.

Kugeza ubu CAF ntacyo iravuga kuri iki cyemezo cyafashwe na TAS.


Kuri Twitter yabo, Esperance de Tunis bongeye gushimangira ko ari bo begukanye igikombe

TAS yateye utwatsi icyemezo cya CAF, yemeza Esperance de Tunis nk’ikipe yatwaye CAF Champions League 2018/19

@Umubavu.com





Tanga igitekerezo kuri iyi nkuru



Igitekerezo