Senderi watakaga inzara kubera kutitabira Guma Guma birangiye n’iya 8 imusize hanze y’urugi

Kimwe n’abandi bahanzi nyarwanda bamaze igihe batakambira Bralirwa ko yabakomorera ntigendere ku myaka umuhanzi agomba kuba afite kugira ngo yemererwe kwitabira irushanwa rya Primus Guma Guma Super Star, birangiye umuhanzi Senderi International Hit wakunze gutaka inzara cyane kubera kutitabira iri rushanwa akuriwe inzira ku murima ko atemerewe kwitabira n’iry’uyu mwaka nyuma yuko amabwiriza yashyizwe ahagaragara atemerera umuhanzi urengeje imyaka 35 y’amavuko.

Umuhanzi Senderi International Hit ni umwe mu bahanzi nyarwanda bamaze iminsi batakambira abashinzwe gutegura irushanwa rya Primus Guma Guma Super Star by’umwihariko we asaba ko bakwita cyane ku bikorwa by’umuhanzi aho kwita ku myaka afite ngo kuko gusaza ari mu mutwe.

Ku bw’amahirwe makeya, birangiye n’ubundi ibyo Senderi na bagenzi be barimo nk’umuhanzi Danny Vumbi nawe urengeje imyaka 35 y’amavuko bakunze gusaba Bralirwa bitabagendekeye uko babyifuzaga nyuma yuko amabwiriza yashyizwe ahagaragara muri uyu mwaka n’ubundi hazamo itegeko ko umuhanzi urengeje imyaka 35 atemerewe kwitabira Guma Guma ku nshuro yayo yayo ya 8.

Mu bigenderwaho kugira ngo umuhanzi yemererwe guhatanira PGGSS8, harimo ko:

1- Uhatana agomba kuba afite ubwenegihugu bw’u Rwanda kandi akorera umuziki ku butaka bw’igihugu.

2- Agomba kuba yujuje imyaka 18 kandi atarengeje 35 y’amavuko

3- Agomba kuba atarigeze atwara iri rushanwa

4- Uwaryitabiriye inshuro eshatu zikurikiranya ntiyemerewe guhatana

5- Kuba yarakoze indirimbo eshatu hagati ya 2016-2018

6- Kuba yarakoze indirimbo ebyiri z’amashusho guhera mu mwaka wa 2016-2018, by’umwihariko imwe muri izo video ikaba yarashyizwe kuri YouTube.

7- Mu bahanzi 10 bazatoranywa hagomba kugaragaramo abakobwa babiri.

PNG - 916.3 kb
Aya ni amabwiriza umuhanzi uzitabira irushanwa rya Primus Guma Guma Super Star ku nshuro yayo ya 8 agomba kuba yujuje
PNG - 545.2 kb
Uru ni urupapuro ruzakoreshwa mu gutora abahanzi bazitabira Guma Guma ya 8


`Kuva mu ntangiriro z’uyu mwaka wa 2018, umuhanzi Senderi International Hit yari akomeje gutakambira abategura irushanwa rya Primus Guma Guma Super Star yewe n’abanyamakuru abasaba ko yakorerwa ubuvugizi iyi ngingo ijyanye n’imyaka igasubirwaho akaba yakwemererwa kwitabira iri rushanwa dore ko anavuga ko kutaryitabira bimuteza inzara n’ubukene.

PNG - 915.4 kb
Kimwe n’umwaka ushize, mu mabwiriza azagenderwaho uyu mwaka umuhanzi urengeje imyaka35 y’amavuko ntiyemerewe kwitabira irushanwa bitumye Senderi yongera gusigara inyuma y’umuryango w’irushanwa


Uretse umuhanzi Senderi na mugenzi we Danny Vumbi nawe aheruka kubwira itangazamakuru ko atabona impamvu ikijyanye n’imyaka gihabwa agaciro aho kureba umwimerere w’ibihangano by’umuhanzi.

Umuhanzi Senderi International Hit wakunze kugarukwaho cyane mu itangazamakuru kubera gutakambira Bralirwa avuga ko ubukene n’inzara bimumereye nabi kubera kutitabira irushanwa rya Primus Guma Guma Super Star, yabonye izuba tariki ya 15 Werurwe 1978 bivuze ko ku munsi w’ejo araba yizihiza isabukuru y’imyaka ye 40 y’amavuko.

Senderi uzwiho kugira udushya twinshi amaze kwitabira irushanwa rya Primus Guma Guma Super Star inshuro ebyiri, nta na rimwe araryegukana gusa kubw’amahirwe makeya imyaka ye ikomeje kumubera imbogamizi yo gukomeza kugerageza kureba ko nawe yaryegukana nk’umuhanzi ku giti cye uretse ko byanamufashaga kubona agafaranga kamufasha gusunika iminsi adahura n’ubukene n’inzara atahwemye gutaka.

Primus Guma Guma Super Star imaze imyaka irindwi ibera mu Rwanda kuva muri 2011. Bwa mbere yatwawe na Tom Close, King James (2012), Riderman (2013), Jay Polly (2014), Knowless (2015), Urban Boyz(2016) ndetse na Dream Boyz iheruka kuritwara muri 2017.

PNG - 762.5 kb
Irushanwa riheruka ryegukanywe n’Itsinda rya Dream Boys


Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo