Real Madrid yirukanye umutoza Lopetegui nyuma yo kunyagirwa na Barcelona

Nyuma yuko mu mpera z’icyumweru gishize ikipe ya Real Madrid inyagiwe akavagari k’ibitego 5-1 mu mukino wayihuje na mukeba wayo w’ibihe byose ariwe FC Barcelona mu mukino umenyerewe nka El Clásico, iyi kipe yamaze gutandukana n’uwari umutoza wayo w’Umunya-Espagne, Julen Lopetegui.

Uyu mutoza w’imyaka 52 yari yahawe akazi tariki 1 Nyakanga 2018 avuye mu ikipe y’igihugu ya Espagne yiteguraga igikombe cy’isi, asabwa gusimbura Zinedine Zidane akegukana ibikombe bitandukanye iyi kipe yegukanye UEFA Champions League iheruka iri guhatanira.

Ntabwo yatangiye neza kuko imikino yatsinze n’iyo yatsinzwe birangana. Mu mikino 14 yamaze atoza Real Madrid yatsinzemo itandatu, atsindwamo itandatu anganya ibiri. Ikipe ye yinjije ibitego 21 ariko nayo yinjizwa ibitego 20.

Muri iyi harimo n’umukino wa shampiyona baheruka kunyagirwamo na FC Barcelona ibitego 5-1 kandi idafite kabuhariwe wayo Lionel Messi.

Uyu musaruro utari mwiza niwo watumye uyu mutoza yerekwa umuryango n’inama y’abayobozi ya Real Madrid yateranye kuri uyu wa mbere iyobowe na Florentino Pérez Rodríguez, umuyobozi mukuru w’iyi kipe.

Real Madrid igiye kuba itozwa na Santiago Hernán Solari Poggio usanzwe atoza ikipe y’ingimbi ‘Real Madrid Castilla’.

Uyu munya-Argentina wakiniye Real Madrid kuva 2000 kugera 2005 yahawe ikipe by’agateganyo mu gihe bivugwa ko Antonio Conte wirukanywe muri Chelsea ariwe ushobora kuyihabwa mu minsi mike iri imbere.

PNG - 714.6 kb
Umutoza Santiago Solari wari asanzwe atoza abana ba Real Madrid niwe ugiye kuba atoza ikipe nkuru by’agateganyo
PNG - 952.5 kb
Umutoza Julen Lopetegui yirukanywe muri Real Madrid nyuma yo kunyagirwa akavagari k’ibitego 5-1 na mukeba w’ibihe byose Barcelona

@Umubavu.com





Tanga igitekerezo kuri iyi nkuru



Igitekerezo