Ari kumwe na Masai Ujiri, Perezida wa Repubulika y’u Rwanda, Paul Kagame yasuye inzu y’imikino n’imyidagaduro ya Kigali Arena yuzuye mu Rwanda.

Iyi nzu izatahwa mu minsi ya vuba, Perezida Kagame ari kumwe n’umuyobozi wa Toronto Raptors (yo muri Amerika ikina muri NBA), umwongereza wavukiye muri Nigeria, Masai Ujiri, basuye Kigali Arena batemberezwa buri gice kiyigize.

Kigali Arena inzu y’imikino n’imyidagaduro yuzuye i Remera i ruhande rwa Stade Amahoro, ifite ubushobozi bwo kwakira abantu ibihumbi 10 bicaye neza.

Nyuma yo gutambagira Kigali Arena, Masai Ujiri yavuze ko ibi Perezida Kagame yabimubwiye umwaka ushize none arabikoze.

Yagize ati"Imvugo niyo ngiro. Nishimiye cyane Perezida Kagame ku iyubakwa rya Kigali Arena. Mu mwaka ushize yatubwiye ko agiye kubikora. Byarakozwe. Ni urugero rw’intagereranywa rw’aho Afurika ihagaze uyu munsi.’’

Kigali Arena izajya yakira imikino itabdukanye nka Basketball, football ikinirwa mu nzu, Volleyball, Tennis ndetse yakire n’ibitaramo.

Iyi nzu mberabyombi ibaye iya kabiri yubatswe muri Afurika nyuma ya Dakar Arena yo muri Senegal, yubatswe mu murwa mukuru w’iki gihugu Dakar.

Kigali Arena ikaba yaratangiye kubakwa mu ntangiriro z’uyu mwaka, imirimo yo kuyubaka ikaba yararangiye hasigaye kuyitaha. Byitezwe ko izatahwa mu minsi ya vuba ariko igihe kikaba kitaramenyekana.

Ni uku Kigali Arena iba irabagirana mu masaha y’umugoroba

@Umubavu.com

---

---