PSG na Barcelone bongeye kuganira kuri Neymar, ngo byagenze neza

Abayobozi bo mu ikipe ya Paris Saint-Germain na Barcelone baraye bahuriye i Paris mu murwa mukuru w’u Bufaransa baganira ku masezerano ashobora gutuma Neymar asubira muri Barcelone.

Nkuko bivugwa na Guillem Balague, umunyamakuru akaba n’umusesenguzi mu kiganiro cya BBC Radio 5 Live, amakipe yombi avuga ko ibiganiro byagenze neza ariko ko hakiri byinshi byo gukora.

Rutahizamu Neymar w’imyaka 27 ukomoka muri Brazil, yageze muri Paris Saint-Germain mu mwaka wa 2017 avuye muri Barcelone, aguzwe miliyoni 200 z’amapawundi, ya mbere menshi ku isi ku mukinnyi w’umupira w’amaguru.

Barcelone iri gutanga miliyoni 153 z’amapawundi yakwishyurwa nyuma y’umwaka akina nk’inguzanyo.

Igiciro cy’inguzanyo cyaba nibura miliyoni 31.6 z’amapawundi, nubwo Barcelone ishobora no gutanga abandi bakinnyi mu kugabanya umubare w’amafaranga yamugura, mu gihe ibiganiro byo bikomeje.

Ibitangazamakuru byo muri Espanye, nyuma y’amakuru yatangajwe imburagihe, bivuga ko Neymar ari gushyiramo ingufu ngo ayo masezerano yo gusubira muri Barcelone agerweho.

Ntabwo ari kotsa igitutu Paris Saint-Germain, ariko ari kuvuga ko yakwishimira gusubira muri Barcelone aho kujya muri Real Madrid cyangwa Juventus.

Nyuma y’iyo nama y’ejo ku wa Kabiri, Javier Bordas, umwe mu bagize inama nyobozi ya Barcelone, yabwiye abanyamakuru ko amasezerano ari hafi cyane kugerwaho, ariko ko ibiganiro bigikomeje.


Neymar amaze gutsindira PSG ibitego 51 mu mikino 58 amaze kuyikinira mu marushanwa yose hamwe





Tanga igitekerezo kuri iyi nkuru



Igitekerezo