PSG mu mazi abira, Mbappe na Cavani bavunikiye rimwe

Ikipe ya Paris Saint-Germain (PSG) iri mu mazi abira nyuma yuko ba kizigenza bayo barimo Rutahizamu Edinson Cavani agiye kumara ibyumweru bine adakina na Kylian Mbappe akamara ibyumweru bitatu adakina kubera bavunikiye mu gihe kimwe.

Ku cyumweru, basimbujwe nyuma yo kuvunika mu mukino PSG yatsinzemo Toulouse ibitego 4-1.

Cavani, Umunya-Uruguay w’imyaka 32, yavunitse mu itako naho Mbappe, Umufaransa w’imyaka 20, agira ikibazo ku gice cyo hejuru cy’akaguru.

Aba bakinnyi bombi ntabwo bazashobora gukina imikino igera kuri ibiri.

Ariko Cavani ashobora kuzaba yakize ubwo PSG iza ikina umukino wayo wa mbere wo mu matsinda ya Champions League, ku itariki ya 17 cyangwa iya 18 y’ukwezi gutaha kwa cyenda.

Neymar we yahagaritswe gukina imikino itatu ibanza ya Champions League uyu mwaka.

Ariko uyu Munya-Brezili w’imyaka 27 bivugwa ko ashobora gusubira muri Barcelone mbere yuko igura n’igurishwa ry’abakinnyi i Burayi rirangira uyu mwaka ku itariki ya kabiri y’ukwa cyenda.

Cavani kandi ntazashobora gukina imikino ya gicuti ikipe y’igihugu ya Uruguay izakina na Costa Rica na Leta Zunze Ubumwe za Amerika.

Mbappe we ntazashobora gukina umukino w’amajonjora y’igikombe cya Euro 2020 u Bufaransa buzakinira iwabwo bukina na Albania na Andorra.


Kylian Mbappe (uri hagati) amaze gutsinda igitego kimwe mu mikino itatu ya mbere ibanza ya shampiyona PSG yakinnye, naho Edinson Cavani we amaze gutsinda bibiri





Tanga igitekerezo kuri iyi nkuru



Igitekerezo