Nta kindi gihe nigeze ngira amashyushyu nk’aya yo gukina na Barcelone-Jurgen Klopp

Umutoza Jurgen Klopp wa Liverpool avuga ko nta kindi gihe yigeze agira amashyushyu nk’ayo afite ubu yo gukina na Barcelone muri Champions League nubwo yashimangiye ko ikipe ye iza kuhababarira.

Muri uyu mukino uteganyijwe mu ijoro ryo kuri uyu wa gatatu ku isaha ya saa tatu zuzuye, Jurgen Klopp wa Liverpool yavuze ko nubwo ikipe ye iza kuhababarira ikina na Barcelone, iza no kuba ifite amahirwe muri uyu mukino ubanza wa kimwe cya kabiri cy’irushanwa rya Champions League.

Liverpool iraza kuba ikinira na Barcelone ku kibuga cyayo i Nou Camp.

Uyu Mudage utoza Liverpool yagize ati "Turaza kuba turi nta makemwa? Ibyo ntibishoboka. Turaza gukora amakosa? Yego rwose. Turaza kuhababarira? Yego rwose, 100 ku ijana (100%)".

"Haraza kuba ibihe tuza kubona amahirwe? Yego, 100 ku ijana (100%). Nizeye ko tuza kuyabyaza umusaruro - ni byo dushaka kuza kugerageza gukora".

Umutoza Klopp, wagejeje Livepool ku mukino wa nyuma wa Champions League mu mwaka ushize w’imikino, yongeyeho ati "Turi kumva dushobora kuba tumeze neza cyane byo gukina umukino wacu. Barcelone ni ikipe nziza".

"Umwaka ushize twahataniraga igikombe, ariko bo [Barcelone] bamaze imyaka hafi 20 bari mu bagihatanira. Biraza kuba bigoye cyane, ariko nta kindi gihe nigeze ngira amashyushyu nk’aya yo kubona akanya ko gukina [na Barcelone]".

"Nizeye ko abakinnyi banjye na bo baza kuba biyumva nk’uku niyumva".

Kimwe na Liverpool, Barcelone nayo imaze gutsindira ibikombe bitanu bya Champions League.

Ariko bine muri ibyo bikombe Barcelone yabitsindiye mu myaka 13 ishize, mu gihe igikombe kimwe gusa Liverpool iheruka gutsindira guhera mu mwaka wa 1984, yagitsindiye mu mwaka wa 2005.

Barcelone yageze muri ½ nyuma yo gusezerera Manchester United, yegukanye igikombe cya shampiyona ya Espagne mu mpera z’icyumweru gishize, irashaka kongera kugera ku mukino wa nyuma w’iri rushanwa rihuza amakipe akomeye i Burayi nk’uko yabikoze mu 2015.

FC Barcelone irasa n’ifite ikipe yayo yuzuye kuko kugeza ubu umukinnyi udahari ari Rafinha ufite imvune y’igihe kirere mu gihe Lionel Messi na Philippe Coutinho buri umwe yakinnye iminota 45 mu mukino ikipe yabo iheruka gutsindamo Levante ku wa Gatandatu.

Liverpool yajyanye abakinnyi 23 muri Espagne barimo Roberto Firmino wasibye umukino uheruka kubera imvune. Alex-Oxlade Chamberlain ameze neza nyuma yo gukira imvune mu gihe kandi umukinnyi ukiri muto Rhian Brewster na we yajyanye na bagenzi be.

Mu mikino ine iheruka guhuriza amakipe yombi ku kibuga cya FC Barcelone, Liverpool yatsinze inshuro ebyiri, banganya izindi ebyiri.

PNG - 358.8 kb
Jurgen Klopp avuga ko Liverpool iza ’kuhababarira’ ikina na Barcelone ariko ngo anafite amashyushyu yo gukina nayo

Tubibutse ko umukino ubanziriza uyu waraye ubaye, Ajax yo mu Buholandi yaraye isanze Tottenham mu Bwongereza ikayihatsinda igitego 1-0, mu mukino ubanza wa ½ cya UEFA Champions League.

Kuri ubu Ajax irahabwa amahirwe yo kugera ku mukino wa nyuma w’iri rushanwa rihuza amakipe yabaye aya mbere ku mugabane w’u Burayi nyuma yuko igeze muri ½ isezereye ibigugu birimo Real Madrid muri 1/8 na Juventus de Turin muri ¼.

@Umubavu.com





Tanga igitekerezo kuri iyi nkuru



Igitekerezo