Neymar yabuze ku myitozo ya PSG, bica amarenga yo gusubira muri Barcelona

Nyuma yuko Neymar abuze mu myitozo ya mbere y’ikipe ya Paris St-Germain itegura imikino y’umwaka utaha w’imikino bikanaca amarenga ko yaba ashaka gusubira muri Barcelona yahozemo, iyi kipe yamaze gutangaza ko iza gufata ingamba zikwiriye kuri uyu Rutahizamu.

Neymar yagombaga kuba ari kumwe n’abandi mu myitozo ku kibuga cy’iyi kipe kuri uyu wa mbere.

Hari amakuru avuga ko uyu musore yaba ashaka gusubira mu ikipe ya FC Barcelona yahozemo.

Itangazo rya Paris St-Germain riravuga ko Neymar Jr atageze aho yari akwiriye kuba ari ku gihe cyumvikanyweho, ibi kandi akaba nta burenganzira yabiherewe.

Iri tangazo riti "Iyi kipe ibabajwe n’iki gikorwa".

Leonardo, umuyobozi w’iyi kipe, yabwiye ikinyamakuru Le Parisien ko Neymar ashobora kuva muri PSG mu gihe habaye ubwumvikane bunyuze impande zombi.

Yemeje ko hari ukuvugana koroheje kwabayeho na Barcelona.

Ati "Ariko kugeza ubu ntabwo tuzi niba hari ushaka kumugura ku kihe giciro. PSG irashaka kugendera ku bakinnyi bifuza kuguma mu ikipe bakubaka ikintu kinini".

Ibinyamakuru byo muri Brezili bivuga ko se wa Neymar yatangaje ko umuhungu we atitabiriye imyitozo y’ikipe ye kuko yari mu bikorwa byo gufasha abicishije mu kigo cyamwitiriwe, Neymar Institute.

Se usanzwe unamuvuganira, avuga ko batari kwimura ibi bikorwa bateguye mu gihe cy’umwaka, ko Neymar azasubira mu ikipe ye ku itariki 15 y’uku kwezi.

Mu 2017, Neymar yaje muri PSG avuye muri Barcelona aguzwe Miliyoni 200 z’amadolari ya Amerika, akaba ari we mukinnyi waguzwe aka kayabo kugeza ubu ku isi.

Amaze gutsindira iyi kipe ibitego 34 mu mikino 37 ya Shampiyona, ariko amaze no kugaragara mu bikorwa binyuranye by’imyifatire idahwitse, harimo guhagarikwa imikino itatu kubera gusagarira umufana.

Neymar kandi ntabwo azakina imikino itatu y’amakipe yabaye aya mbere i Burayi kubera gutuka umusifuzi mu mikino iheruka.

Mu cyumweru gishize, Perezida wa Barcelona Josep Bartomeu yavuze ko Neymar ashaka kuva mu ikipe ya PSG kuri iyi mpeshyi.

Ibinyamakuru muri Espagne, byemeza ko Neymar yemera kugabanya ku mushahara we wa Miliyoni 12 z’ama-Euro ku mwaka kugira ngo agaruke ku kibuga Nou Camp cya Barcelona, aho yakinnye hagati ya 2013 na 2017.

Barcelona irashaka kandi kuzana Rutahizamu w’Umufaransa Antoine Griezmann imuvanye muri Atletico Madrid.


Biravugwa ko Neymar Junior, umukinnyi uhenze kurusha abandi ku isi, ashaka gusubira muri Barça

@Umubavu.com





Tanga igitekerezo kuri iyi nkuru



Igitekerezo