Ndishimye cyane aka kanya, nkunda umupira w’amaguru-Sadio Mane

Ku mugoroba w’ejo ku wa Kabiri, nibwo Rutahizamu w’ikipe ya Liverpool yo mu gihugu cy’u Bwongereza ukomoka muri Senegal, yatowe nk’umukinnyi mwiza w’umunyafurika mu mwaka wa 2019.

Uyu mukinnyi wigaragaje cyane muri 2019, iki gihembo yagihawe ahigitse bagenzi be nka Mohamed Salah ukomoka mu Misiri, Riyad Mahrez wo muri Algeria.

Sadio Mane w’imyaka 27 yegukanye iki gikombe ku nshuro ya mbere nyuma yo kuza mu bakinnyi 3 beza ku mugabane wa Africa inshuro 3 zikurikiranya.

Mu mwaka ushize yafashije ikipe ya Liverpool ,gutwara igikombe cya 6 cya Champions League, atsinda n’ibitego 30 mu mwaka w’imikino ushize.

Muri uyu mwaka w’imikino wa 2019/2020 amaze gutsinda ibitego 15, ikipe ye ya Liverpool ikaba iri ku mwanya wa mbere muri Premier League, aho inarusha ikipe iyikurikiye amanota 13.

Uyu mukinnyi akimara gutwara iki gikombe yashyikirijwe na Perezida wa CAF, yagize ati "Ndishimye cyane aka kanya nkunda umupira w’amaguru. Ndashimira umuryango wanjye, ikipe y’igihugu, abatoza ishyirahamwe ry’umupira w’amaguru muri Senegal n’ikipe nkinira ya Liverpool. Ni umunsi ukomeye mu buzima bwanjye.”

Iki gihembo acyambuye Salah, wagitwaye mu myaka 2 ishize nyuma ya Mahrez na we wari wagitwaye muri 2016.

Mu ikipe y’abakinnyi 11 beza b’abanyafrica mu mwaka wa 2019 harimo abakinnyi 6 bose bakina mu Bwongereza, kongeraho umusore Idriss Ghana Gueye wakinaga mu Bwongereza ubu akaba yarerekeje muri Paris Saint Germain mu Bufaransa.







Tanga igitekerezo kuri iyi nkuru



Igitekerezo