MissRwa2019: Mwiseneza yeretse igihandure bagenzi be mu matora yo ku mbuga nkoranyambaga

Mwiseneza Josiane uri mu bahatanira ikamba rya Nyampinga w’u Rwanda 2019, yanikiriye bagenzi be bahanganye mu matora yo ku mbuga nkoranyambaga.

Kuwa 30 Ukuboza 2018 abakobwa bose 37 bahagarariye intara 5 n’Umujyi wa Kigali, bahuriye i Rusororo mu nyubako ya Intare Conference Arena, batombora nimero zizajya zibaranga muri iri rushanwa.

Bukeye bwaho abategura iri rushanwa batangaje uburyo bushya bwo gutora abahataniye ikamba rya 2019. Aho abaturage bashobora gutora banyuze baciye ku mbuga nkoranyambaga z’irushanwa rya Nyampinga w’u Rwanda bagakunda (Like) ifoto bashatse y’umukobwa uhatanye.

Kugeza ubu, hashize iminsi itatu gutora bitangiye. Nk’uko amajwi abigaragaza, ifoto ya Mwiseneza Josiane watorewe mu Ntara y’Uburangerazuba iri gukundwa ku kigero cyo hejuru cyane, ugereranyije n’abandi bahanganye.

Uyu mukobwa ufite nimero 30, kuri Instagram ifoto ye imaze gukundwa n’abantu basaga ibihumbi 17, mu gihe umukurikiye ari uwitwa Umutoni Deborah ufite ifoto yakunzwe n’abasaga ibihumbi 13.

Uwitwa Tuyishimire Vanessa afite amajwi asaga ibihumbi bitandatu, Teta Fabiola afite asaga ibihumbi bitanu, abandi baracyari inyuma cyane.

Kuri Facebook nabwo Mwiseneza yanikiriye abo bahanganye ku buryo bugaragara, kuko afite amajwi asaga 3000, Umutoni Deborah afite amajwi 500, Ricca Michaella Kabahenda afite amajwi 460, Umutoni Grace afite 400.

Mwiseneza wanikiye bagenzi be, yavuzwe cyane ubwo yajyaga guhatana mu karere ka Rubavu, yabanje gukora urugendo n’amaguru, akanagerayo yasitaye.

Yataramiweho na benshi ku mbuga nkoranyambaga, bamwe bamunnyega, gusa hari n’abandi bamushimye ku bwo kwitinyuka, akarenga imbibi z’abavuga ko iri rushanwa iry’abana bo mu bakire.

Benshi biyemeje kumutera inkunga mu buryo bushoboka, yaba iy’amafaranga cyangwa kumutora, kugira ngo bamufashe kugera ku ntsinzi.

Umukobwa uzaba yatowe kurusha abandi azahita akatisha itike imujyana mu mwiherero uzakorwa n’abakobwa 20, bazamenyekana kuwa 05 Mutarama 2018.

PNG - 1.2 Mb
Yaje kwitabira irushanwa rya Miss Rwanda 2019 n’amaguru, ibintu byamuhesheje kumenywa na benshi banagaragaza ko bamushyigikiye mu buryo budasanzwe
PNG - 905.4 kb
Mwiseneza yakomeje muri iri rushanwa atambutse imbere y’akanama nkempurampaka yemye nta shiti
PNG - 1.1 Mb
Mwiseneza Josiane yanikiye abakobwa bagenzi be bari guhatanira ikamba rya Nyampinga w’u Rwanda 2019

@Umubavu.com





Tanga igitekerezo kuri iyi nkuru



Igitekerezo