Messi yatanze ubusabe bwo kuva muri Barcelona

Rutahizamu w’ikirangirire wa Barcelona, Lionel Messi, yasabye kuva muri iyi kipe kuri iyi mpeshyi.

Uyu Munya-Argentine w’imyaka 33 y’amavuko, ejo ku wa Kabiri yoherereje Barcelona ubutumwa mu buryo bwa ’fax’ avuga ko yifuza gukoresha ingingo iri muri kontaro ye, imwemerera kuva muri Barcelona ku buntu kandi ako kanya.

Barça yanyagiwe ibitego 8 - 2 na Bayern Munich muri kimwe cya Kane cya Champions League, hari ku itariki ya 14 y’uku kwezi kwa munani.

Uyu watwaye umupira wa Zahabu, Ballon d’Or inshuro esheshatu nk’uwarushije abandi bakinnyi b’umupira w’amaguru ku isi, yageze muri Barça mu mwaka wa 2004. Yegukanye Champions League enye.

Ariko, Barcelona yemeza ko iyo ngingo yo muri kontaro ubu yarengeje igihe, ko rero Messi afitanye amasezerano nayo yo kuyikinira kugeza mu mwaka wa 2021, kandi icyo gihe ikipe yamugura ikabanza kwishyura Barcelona miliyoni 700 z’ama-euro.

Biteganyijwe ko inama nkuru y’ubuyobozi bwa Barcelona iterana vuba aha, kandi bamwe bavuga ko ikintu kimwe cyonyine cyatuma Messi acururuka ari ukwegura kwa Perezida Josep Maria Bartomeu w’iyi kipe, kandi amatora akigizwa imbere.

Ariko bisa nkaho Messi yiyemeje kuva muri iyi kipe uko byagenda kose.

Nyuma yuko iyi nkuru imenyekanye, abafana ba Barça bateraniye hanze y’ikibuga cyayo Nou Camp barigaragambya bamagana ubuyobozi bukuru bw’iyi kipe ndetse bashyigikira uyu rutahizamu ufite umuhigo wo kuyitsindira ibitego byinshi kurusha abandi.

Biteganyijwe ko hakurikiraho urubanza hagati y’iyi kipe n’uyu mukinnyi.

Messi yari afite ingingo muri kontaro ye yamwemereraga kuva muri iyi kipe ku buntu, iyo mbere y’itariki ya 10 y’ukwa Gatandatu aza kuyimenyesha ko ashaka kuyivamo.

Iyo tariki ubu yararenze, none Barça yemeza ko iyo ngingo yataye agaciro, ariko Messi n’abo mu itsinda rye bumva ko ikwiye kwigizwa imbere ikareba n’uyu mwaka w’imikino wongerewe ukageza muri uku kwezi kwa munani kubera icyorezo cya Coronavirus.

Kuri Twitter, Carles Puyol wahoze akinana na Messi yanditse ati "Ndakubaha kandi ndakwemera, Leo. Ndagushyigikiye jyewe wese, nshuti".

Kuri ubwo butumwa bwa Puyol, Luis Suarez ukinana na Messi kuri ubu, yasubije n’udushusho (emojis) tubiri dukoma amashyi.


Lionel Messi yatsinze ibitego 70 mu mikino 138 yakiniye ikipe y’igihugu ya Argentine

Uwayoboye Operasiyo y’ifatwa rya Kabuga ari I Kigali, yaba aje gukora iki? Minisitiri w’Ibidukikije yihanangirije uw’Uburezi amusaba guhagarika kubaka ibyumba by’amashuri hirengagijwe kwita ku bidukikije, n’andi makuru menshi ni k’UMUBAVU TV ONLINE:





Tanga igitekerezo kuri iyi nkuru



Igitekerezo