Umukinnyi w’icyamamare mu mupira w’amaguru ukomoka mu gihugu cya Argentine, agakinira ikipe ya FC Barcelone yo mu gihugu cya Espagne yatangaje amakipe abiri abona atazaborohera mu mikino y’amakipe yabaye aya mbere iwayo izwi nka UEFA Champions League. Aya makipe Messi yatangaje ni PSG yo mu gihugu cy’u Bufaransa na Manchester City yo mu Bwongereza.

Messi yavuze aya makipe ubwo yahabwaga urukweto rwa zahabu (The Golden Shoe) ku itariki ya 24 Ugushyingo 2017.

Lionel Messi yavuze ko bitewe n’uburyo ikipe ya Manchester na PSG ziyubatse mu gihe cy’igura n’igurisha ry’abakinnyi, bizagorana ku makipe yose uretse na Barcelone akinira gutsinda aya makipe.

Yagize ati “ ikipe ya Man.City na PSG zagaragaje ubudahangarwa kubera abakinnyi kuri ubu zibitseho ku buryo bizagora iya Barcelone nkinira kuyatsinda”.

Abajijwe n’umunyamakuru impamvu muri aya makipe abona zabagora Real Madrid inafite ibikombe bibiri biheruka itarimo, Messi yagize ati “ simbona ko Real Madrid yaba ari ikipe ikanganye ngendeye ku buryo aya makipe yombi ahagaze muri iyi minsi ”.
Messi atangaje ibi mu gihe ikipe ye ya FC Barcelone yamaze gukatisha itiki yo kwerekeza mu mikino ya 1/8 cy’irangiza mu mikino ya Champions League.

Icyakora ntawakwiyibagiza ko nubwo Messi avuze ibi ikipe ye ya Barcelone muri iyi minsi ihagaze neza dore ko ari nayo iyoboye urutonde rw’agateganyo muri shampiyona yo muri Espagne (LaLiga Santander) n’amanota 35 mu gihe mukeba wabo Real Madrid iri ku mwanya wa 4 n’amanota 27 inganya na Atletico Madrid.

Daniel MUKESHIMANA/Umubavu.com

---

---