Meddy ntagitaramiye i Burundi kubera guterwa ubwoba ko azicwa

Ku mpamvu z’umutekano we umuhanzi Meddy yatangaje ko atakigiye i Burundi mu bitaramo byo gusoza umwaka wa 2018 nkuko byari bimaze iminsi byamamazwa ku mbuga nkoranyambaga zitandukanye no mu itangazamakuru.

Meddy yari yatumiwe nk’umuhanzi w’imena mu bitaramo bibiri byari i Burundi mu Mujyi wa Bujumbura. Kimwe cyari kuzaba ku wa 29 Ukuboza 2018 ahitwa Boulevard de l’Uprona, ikindi ahitwa Le Costa Beach bukeye bwaho.

Ni ibitaramo byari bimaze igihe byamamazwa, ndetse Abarundi benshi bari bateguye kwirebera uyu musore w’umunyagikundiro wari utarabatarmira imbona nkubone.

Bijya gutangira uwiyita Gatoto Egide Mathias ku rubuga rwa Facebook, yanditse amagambo agaragaza urwango bamwe mu Barundi bafitiye abanyarwanda, ashimangira ko Meddy nakandagira muri iki gihugu bazamwica.

Ibi byageze kuri uyu muhanzi bimutera amakenga ubwe n’abanyarwanda muri rusange, bashakaga kujya gusoreza umwaka wa 2018 muri iki gihugu cy’abaturanyi.

Kuri uyu wa 27 Ukuboza 2018, Meddy yashyize ahagaragara itangazo yisegura ku bakunzi be b’i Burundi, ko atakigiye yo kubataramira. Impamvu nta yindi ni ukutizera umutekano we.

Ati “ Ku bafana bacu , ubujyanama bwa Meddy bubabajwe no kubamenyeshaka ko bwasubitse ibitaramo yagombaga gukorera i Burundi bitewe n’impamvu z’umutekano.”

Yongeyeho ko “abari baguze amatike turabashimira cyane, kandi muzasubizwa. Turizera kuzataramana na mwe vuba.”

Ubwo Meddy yageraga mu Rwanda ku wa 24 Ukuboza 2018, yari yavuze ko nta kizamubuza kujya gutaramira i Burundi n’ubwo hari abari bagerageje kumutera ubwoba.

Ati “Ibintu bivugwa ntabwo byatubuza gukora akazi, nta rimwe ibintu bijya bimera neza 100%, twebwe nk’abahanzi dukora akazi dushinzwe gukora n’abategura ibitaramo bagakora ibyabo.”

Umuyobozi wa Crystal Events, Paulin Bizimana, wari watumiye uyu muhanzi, yari aherutse kubwira IGIHE ko umutekano wa Meddy witaweho cyane, ku buryo bari baramaze kumushakira abapolisi bazamurinda.

Ibitaramo bya Meddy bisubitswe nyuma y’aho na Bruce Melody wari ufite ibitaramo mu Mujyi wa Gitega n’i Bujumbura, aretse kujyayo nawe bitewe no kutizera umutekano we. Icyo yagombaa gukora kuri Noheli yasimbujwe Kidumu.

Ku wa 01 Mutarama 2018, Meddy ari kumwe n’abahanzi basanzwe baba mu Rwanda nka Bruce Melodie, Riderman, Yvan Buravan na Social Mula bazataramira abatuye i Kigali mu gitaramo cya East African Party kigiye kuba ku nshuro ya 11.

PNG - 1.4 Mb
Meddy yasubitse ibitaramo yagombaga gukorera i Burundi nyuma yo guterwa ubwoba ko azicwa
PNG - 1.3 Mb
Meddy yasubitse ibitaramo yagombaga gukorera i Burundi
PNG - 149.8 kb
Abareberera bakanacunga ibikorwa by’umuhanzi Meddy basohoye itangazo rivuga ko ibitaramo by’i Burundi bitakibaye

@Umubavu.com





Tanga igitekerezo kuri iyi nkuru



Igitekerezo