LA LIGA ntiyifuza ko Messi ava muri FC Barcelona ku buntu

Ubuyobozi bwa shampiyona y’umupira w’amaguru mu cyiciro cya mbere muri Espagne, La Liga, buvuga ko ingingo yo muri kontaro ivuga ko ikipe yagura rutahizamu Lionel Messi igomba kubanza kwishyura Barcelona miliyoni 700 z’ama-euro, igifite agaciro.

Ku wa Kabiri w’icyumweru gishize, Messi w’imyaka 33 y’amavuko yabwiye iyi kipe ko yifuza kuyivamo.

Ndetse ejo ku Cyumweru, ntabwo yitabiriye isuzumwa na muganga rikorwa mbere yuko umwaka w’imikino mushya utangira.

Uyu rutahizamu ukomoka muri Argentine afite gahunda yo kwifashisha ingingo yo muri kontaro afitanye na Barcelona imwemerera kuyivamo ku buntu, ariko iyi kipe ivuga ko igihe yari abyemerewe cyamaze kumurengana.

None ubu La Liga iravuga ko itazandukura (itazasiba) Messi mu bakinnyi bo muri iyi shampiyona, keretse iyo ngingo yo kwishyura miliyoni 700 z’ama-euro imaze kubahirizwa.

Mu itangazo La Liga yasohoye yagize iti "Bijyanye n’itegeko rikurikizwa, La Liga ntabwo izemera ubusabe bwo kwandukurwa nk’umukinnyi wo mu ishyirahamwe ry’umupira w’amaguru rya Espagne keretse amafaranga avugwa mu ngingo ijyanye no kuva mu ikipe amaze kwishyurwa".

Ejo ku Cyumweru, byari biteganyijwe ko Messi aba ari ku kibuga cy’imyitozo cya Barcelona saa yine n’iminota 15 za mu gitondo ku isaha yaho (ari nayo yo mu Rwanda no mu Burundi), ariko ntiyahageze.

Abanyamategeko be barateganya kwisunga ingingo iri muri kontaro nshya y’imyaka ine yagiranye n’iyi kipe mu mwaka wa 2017.

Iyo ngingo yajyaga kumwemerera kuva muri iyi kipe ku buntu iyo abisaba bitarenze tariki ya 10 y’ukwezi kwa Gatandatu uyu mwaka.

Abanyamategeko be barateganya gushinga urubanza bavuga ko iyo tariki, yari ihuye n’isozwa rya shampiyona, ubu ntacyo ikivuze kubera ko icyorezo cya Coronavirus cyatumye habaho gutinda, umwaka w’imikino ukongerwa bigatuma ikipe ikina kugeza mu kwezi kwa munani.


Messi yegukanye igihembo cya Ballon d’Or inshuro esheshatu anatwara Champions League enye ari kumwe na Barça

Umwana w’umudipolomate yamennye amabanga y’ukuntu se yamushutse bakamushimuta, iyumvire muri iyi Video byose:





Tanga igitekerezo kuri iyi nkuru



Igitekerezo