Jose Mourinho yirukanywe muri Tottenham Hotspur

Ikipe ya Tottenham Hotspur yirukanye umutoza wayo Jose Mourinho mbere y’icyumweru ngo iyi kipe ikine na Manchester City umukino wa nyuma wa Carabao Cup uteganyijwe kubera i Wembley.

Mourinho w’imyaka 58 yageze muri Tottenham asimbuye Mauricio Pochettino mu Ugushyingo 2019, wari umaze kugeza iyi kipe ahantu heza mu mateka yayo harimo n’umukino wa nyuma wa UEFA ChampionsLeague mu 2019.

Ibinyamakuru bitandukanye byo mu Bwongereza byatangaje ko Ryan Mason na Chris Powell ari bo bashobora gutoza imikino isigaye muri uyu mwaka w’imikino.

José Mourinho yirukaniwe ko Tottenham iheruka kunganya na Everton ibitego 2-2 ku wa Gatanu, ishobora kutitabira amarushanwa y’i Burayi mu mwaka utaha w’imikino.

Kuri ubu, iyi kipe iri ku mwanya wa karindwi muri Premier League irushwa amanota atanu na Chelsea ya kane mu gihe isigaje imikino itandatu.

Byitezwe ko Tottenham itangira gushaka umutoza mushya uzahabwa akazi mu mpeshyi, ndetse mu mazina agarukwaho cyane harimo Julian Nagelsmann utoza RB Leipzig.

Mu mwaka wa mbere atoza Tottenham, Mourinho wanyuze mu yandi makipe arimo Real Madrid, Chelsea, Inter Milan na Manchester United, yayifashije gukina Europa League nyuma yo kuba iya gatandatu kandi yarayisanze ku mwanya wa 14.

Gusa, nyuma yo kuyihesha gukina UEFA Champions League mu mwaka ushize w’imikino, yasezerewe na RB Lepizig muri 1/8.





Tanga igitekerezo kuri iyi nkuru



Igitekerezo