Icyamamare Rick Ross mu bashobora kuzataha ubukwe bwa Diamond yasubitse

Nyuma y’iminsi mike umuhanzi Diamond Platnumz atangaje ko we n’umukunzi we w’Umunya-Kenya wamutwaye umutima witwa Tanasha Dona batangaje ko bazakora ubukwe ku munsi w’abakundana umenyerewe nka ‘Saint Valentin’, amakuru mashya ni uko ubu Diamond yamaze gusubika ubu bukwe bwitezwe na benshi kugira ngo abutegure ku rwego rwo hejuru.

Diamond Platnumz na Tanasha Dona Oketch batangiye gusakaza iby’urukundo rwabo mu Ugushyingo umwaka ushize.

Bigitangira bamwe bagize ngo ni urwenya ariko bitangira gukomera ubwo aba bombi batangazaga ko bafite ubukwe ku wa 14 Gashyantare 2019.

Bari baherutse gushimangira ko ubukwe bwabo buzaba mu minsi ine yikurikiranya aho buzarangira bagahita berekeza i Dubai mu kiruhuko cy’ukwezi kwa buki.

Ubu iby’urukundo rw’aba bombi byatangiye gukemangwa nyuma y’aho Diamond atangaje ko yabaye asubitse ubukwe bwabo.

Aganira na Wasafi TV, Diamond yavuze ko yabaye yigije inyuma itariki y’ubukwe kubera ko ashaka kuzakora ibirori by’akataraboneka binogeye ijisho kandi bikitabirwa n’ibyamamare bitandukanye ndetse n’abandi bantu benshi.

Ati “Ubukwe bwanjye bwagombaga ku munsi w’abakundana tariki 14 Gashyantare 2019, ariko twabwigije inyuma. Hari abantu benshi bagomba kubwitabira. Ndateganya ko na Rick Ross azaba ari mu bantu bafite amazina akomeye bazabwitabira.”

Aba bombi bari baragiye kwiyereka imiryango ndetse ishima umubano wabo inawuha imigisha.

Umwaka ushize nibwo Diamond na Tanasha ukorera radiyo yo muri Kenya yitwa NRG, batunguye benshi bavuga ko bakundana.

Hari abatangiye gukemanga uyu mubano bemeza ko washibutse mu masezerano y’imikoramire ku bitaramo byo muri Kenya iyi radiyo yari ifitanye na Wasafi ndetse bagashimangira ko ibyawo byarangiranye na yo.

Hari n’abahamyaga ko ibi byakozwe mu buryo bwo kwamamaza no gukomeza gushitura benshi.

Mu gihe cy’ukwezi n’imisago inkuru zitandukanye zimaze iminsi zandikwa ku rukundo rwa Diamond na Tanasha, ariko mu minsi ishize uyu mukobwa yavuze ko ahagaritse ibyo gushyira umubano we n’umukunzi ku karubanda anasiba amafoto bombi bari bahuriyemo.

Hashize iminsi bongeye gukwirakwiza amafoto bishimanye nyuma y’ibitaramo bya Wasafi Festival i Embu, Mombasa na Nairobi muri Kenya bashaka gukomeza kwemeza abantu ko iby’urukundo rwabo ari ukuri.

Yaba Tanasha cyangwa Diamond nta n’umwe wigeze yemeza cyangwa ngo ahakane niba urukundo rwabo rugamije kwamamaza.

PNG - 913.8 kb
Ubukwe bwa Diamond na Tanasha bwari buteganyijwe ku wa 14 Gashyantare 2019
PNG - 839.1 kb
Diamond na Tansha bari mu rukundo rw’igifute
PNG - 940 kb
Uretse Diamond yatwaye uruhu n’uruhande, uyu mukobwa amaze iminsi avugisha benshi mu karere ka Afurika y’Ibirasirazuba
PNG - 620.5 kb
Diamond ati "Ndateganya ko na Rick Ross azaba ari mu bantu bafite amazina akomeye bazitabira ubukwe bwange"

@Umubavu.com





Tanga igitekerezo kuri iyi nkuru



Igitekerezo