Iby’ingenzi wamenya kuri Premier League igarutse nyuma y’amezi atatu

Kuri uyu wa Gatatu tariki ya 17 Kamena 2020, Shampiyona y’umupira w’amaguru mu Bwongereza izwi cyane nka Premier League irasubukurwa …ariko ntiza kuba imeze nk’uko dusanzwe tuyizi, igarutse nyuma y’iminsi 100 itaba kubera icyorezo cya COVID-19, Aston Villa na Sheffield United ni wo mukino uri bubanzirize iyindi uyu munsi.

Biteganyijwe ko imikino 92 isigaje gukinwa izarangira tariki 26 y’ukwezi gutaha kwa Karindwi.

Imikino izajya ibera mu bibuga bitarimo abafana, ni imwe mu ngamba zo kwirinda ubundi bwandu bushya bw’iyi virus.

Harafatwa umunota umwe wo kuzirikana abantu bishwe n’iki cyorezo mbere y’uko ruhago yongera guterwa ku mikino ya mbere.

Ku myenda y’abakinnyi haraba hariho udutambaro tw’ishusho y’umutima mu kwifatanya n’abakozi b’urwego rw’ubuzima bahanganye n’iki cyorezo.

Ku mikino 12 ya mbere y’iki gice gisubukuwe, amazina y’abakinnyi inyuma ku myenda yabo azasimbuzwa ijambo "Black Lives Matter" , bivuze ngo ubuzima bw’abirabura bufite agaciro.

Ni nyuma y’iyicwa ry’umwirabura George Floyd muri Amerika ryateye inkubiri y’imyigaragambyo ahatandukanye ku isi.

Mu nshuro umunani z’ibipimo zafatwaga buri byumweru bibiri ku bakinnyi n’abatoza ba Premier League, abantu 16 ni bo basanze barayanduye mu bipimo 8,687 byafashwe.

Imikino yose hamwe 92 isigaye izajya yerekanwa ’Live’ iri kuba ku matereviziyo atandukanye ku isi.

Liverpool iri imbere ho amanota 25 iziyikurikiye, mu gihe Bournemouth, Aston Villa na Norwich City ziri inyuma.

Liverpool irahatanira gutwara iki gikombe iheruka mu myaka 30 ishize.

Iramutse itsinze umukino wayo wa mbere muri uku gusubukura, naho iya Kabiri Manchester City igatsindwa na Arsenal, izahita icyegukana.

Kuki Premier League igarutse ubu?

Mu gihe imibare y’abandura bashya igenda igabanuka mu Bwongereza leta igenda yoroshya ingamba zikomeye zari zarafashwe, amakipe agize Premier League nayo yumvikanye gusubukura ariko hari ingamba zo kwirinda.

Leta y’u Bwongereza nayo yemeye ko amarushanwa y’imikino ashobora gusubukura ariko nta bafana bari ku bibuga guhera tariki ya mbere z’uku kwezi kwa Gatandatu.

Amakipe yari amaze igihe gito asubukuye gukora imyitozo.

Abakinnyi ba Premier League n’abatoza bazakomeza gusuzumwa Kabiri mu cyumweru, uwo basanzemo iyi ndwara ashyirwe mu kato iminsi irindwi.

Imikino iraba ryari?

Uyu munsi Aston Villa irahura na Sheffield United mu mukino utangira guhera saa moya z’ijoro ku isaha yo mu Burundi no mu Rwanda.

Uwo urabanziriza umukino wa Manchester City yakira Arsenal guhera saa tatu na 15 ku isaha yo mu Burundi no mu Rwanda.

Indi mikino yose hamwe y’umunsi izaba mu mpera y’iki cyumweru.

Ingamba zafashwe ni izihe?

Imikino yose izaba nta bafana, gusa hari abantu bacye bafite imirimo bemewe muri stade batagomba kurenga 300.

’Stades’ zizaba zigabanyijemo ibice bitatu, umutuku (ikibuga n’aho abasimbura bicara), umuhondo uburira (mu myanya y’abafana), icyatsi (ibindi bice by’inyuma muri ’stade’), buri wese mu bemerewe akaba azi aho atarenga.

- Amakipe araba yemerewe abasimbura batanu aho kuba batatu nk’ibisanzwe, urutonde rwabo baraba ari icyenda aho kuba barindwi.

- Abakinnyi ntibemerewe gusuhuzanya mbere y’umukino no kwinjira mu kibuga begeranye, imipira bakina, uduti two muri koruneri, amazamu n’ibikoresho bigaragaza gusimbuza bizajya bisukurwa kenshi mbere no mu mukino.

- Abaganga, abatoza n’abasimbura beretswe uko bazajya bagenda aho bemerewe mu kubahiriza kutegerana.

- Ibiganiro n’abanyamakuru nyuma y’umukino bizajya bitangirwa iruhande rw’ikibuga hifashishijwe ikoranabuhanga.

- Ikoranabuhanga rya VAR rizakomeza kwifashishwa.

Premier League yasubitswe kugeza igihe kitazwi kuva tariki ya 3 Mata mu gihe umukino wayo uheruka gukinwa ari uwabaye tariki ya 9 Werurwe 2020.

Iyi shampiyona ikundwa na benshi yasubitswe hasigaye imikino icyenda ngo isozwe, ikipe ya Liverpool niyo iyoboye urutonde rwa shjampiyona aho yanikiye andi makipe, ikaba ari nayo ifite amahirwe menshi yo kwegukana igikombe cy’uyu mwaka.

Ku ikubitiro shampiyona yo mu Budage ’Germany Bundesliga’ yamaze kwegukanwa na Bayern Munich, ni yo yabimburiye izindi kumanuka mu kibuga aho imikino ya mbere yakinwe ku wa Gatandatu tariki 16 Gicurasi.


Liverpool ishobora guhita itwara igikombe ku mukino wa mbere wo gusubukura

Madamu Ingabire Victoire uherutse gusakwa na RIB, kuri uyu wa Gatatu tariki ya 17 Kamena 2020 aritaba RIB, n’andi makuru menshi utapfa gusanga ahandi urayasanga k’UMUBAVU TV ONLINE:





Tanga igitekerezo kuri iyi nkuru



Igitekerezo