Gacinya wari Visi Perezida wa Rayon Sports yasabiwe igifungo cy’imyaka 6 akanatanga ihazabu y’akayabo

Uwari Visi Perezida w’ikipe ya Rayon Sports akaba n’umushoramari mu bikorwaremzo, Gacinya Chance Denis yasabiwe igifungo cy’imyaka 6 mu gihe uwo bareganwa Mataha J Paul we yasabiwe igifungo cy’imyaka 7 n’ihazabu ya Miliyoni 2 z’amafaranga y’u Rwanda kuri buri wese.

Intandaro y’ugutabwa muri yombi kw’aba bakurikiranywe n’ubushinjacyaha uko ari 2 ni raporo y’umugenzuzi mukuru w’imari ya leta y’umwaka w’ingengo y’imari y’umwaka wa 2015- 2016 aho yagaragaje ukudindira k’umushinga wagombaga gukwirakwiza amashanyarazi ku mihanda 11 yo mu mujyi wa Rusizi ndeste ngo hakaba haranakoreshejwe ibikoresho bitari bikubiye mu masezerano Akarere ka Rusizi kari kasinyanye na Sosiyete MICON REAL LINE LTD ihagarariwe na Gacinya Chance Denis.

Uku gukoresha ibikoresho binyuranye n’ibyari mu masezerano ngo nibyo byanatumye amatara yaka ku kigereranyo cya 50.42% ndetse iyi Sosiyete inishyurwa amafaranga menshi ari nabyo byatumye ngo haseswa amasezerano isoko rigahabwa undi nk’uko ubushinjacyaha bwabivuze.

Ibi kandi ngo byakozwe hashingiwe kuri Raporo yakozwe n’ikigo gishinzwe gukwirakwiza amashanyarazi, REG ndetse n’Akarere ka Rusizi.

Ibi rero ngo nibyo bigize icyaha cyo kubeshya uwo bakoranye amasezerano ubushinjacyaha burega Gacinya Chance Denis uhagarariye sosiyete MICON REAL LINE LTD, mu gihe mugenzi we MATAHA Jean Paul wari umukozi w’Akarere ka Rusizi aregwa kuba ikitso mu ikorwa ry’iki cyaha nk’umukozi ngo wari ushinzwe gukurikirana ikwirakwizwa ry’aya mashanyarazi akaba yaragombaga kugenzura niba ibyakozwe bikubiye muri DAO nyamara ngo bikaba bitarakozwe.

Mu kwiregura kw’abo, bombi batangiye bahakana ibyo bashinjwa, Gacinya Chance Denis n’abamwunganira bavuga ko uregwa nta masezerano yigeze asinyana n’uwo ariwe wese, ahubwo ko yasinywe hagati y’Akarere ka Rusizi na Sosiyete yitwa MICON REAL LINE LTD ifite ubuzima gatozi kandi ikaba igizwe n’abanyamigabane batadukanye bityo bakaba batumva uko ubushinjacyaha bwahitamo ugomba kubazwa iby’iyo Sosiyete.

Byongeye kandi, ushinjwa kimwe n’abamwunganira basabye ko inyandiko ubushinjacyaha buheraho bubarega itahabwa agaciro kuko yakozwe n’uruhande rumwe ariko Karere kagamije ngo kwigaragaza neza imbere y’umugenzuzi mukuru w’imari ya Leta ku makosa kakoze kakayegeka kuri Rwiyemezamirimo kuko ngo mu masezerano bagiranye ibibazo byose byagombaga kugaragara byagombaga kujya biganirwaho n’impande bireba ariko Akarere ngo gaca inyuma kajya gukoresha raporo sosiyete itabizi.

Kuri Mataha Jean Paul uregwa kuba ikitso muri iki cyaha nawe kimwe n’umwunganizi we basabye gutesha agaciro iyo raporo ya REG kimwe n’Akarere ishingirwaho kuko ngo ari iy’uruhande rumwe, akanibaza impamvu atanayigizemo uruhare kandi yari akiri mu kazi ubwo iyo raporo yakorwaga.

Ku cyaha cya 2 cyo kwandika no gukoresha inyandiko mpimbano naho Mataha J Paul akaba ikitso cye muri icyo cyaha nk’uko ubushinjacyaha bubivuga buhereye kuri raporo n’ubundi yakozwe na REG hamwe n’Akarere ka Rusizi, Gacinya Chance Denis ngo yakoresheje ibikoresho bitari bikubiye mu masezerano kandi yishyurwa amafaranga menshi bimaze kwemezwa na Mataha Jean Paul nk’umukozi w’Akarere wari ushinzwe gukurikirana uwo mushinga.

Abaregwa ariko bongeye kugaragaza ko batemera iyi raporo ubushinjacyaha bushingiraho kuko ngo yakozwe n’uruhande rumwe bityo basaba ko iteshwa agaciro.

Byongeye kandi, abaregwa baragaraje ko inyandiko ubushinjacyaha buheraho bubashinja ahubwo ibashinjura kuko buvuga ko Gacinya yahawe amafaranga ku mirimo atakoze nyamara muri iyo raporo bikaba bigaragara ko amafaranga bavuga ntayo yishyuje.

Ku cyaha cya 3 kiregwa Mataha Jean Paul cyo gutanga inyungu zidafite ishingiro naho Gacinya akaba icyitso mu ikorwa ryacyo, ubushinjacyaha bwavuze ko Gacinya yishyuje miliyoni zisaga gato 174 Mataha arabyemeza ko zihwanye n’imirimo yari imaze gukorwa nyamara ngo nyuma bikaza kugaragara ko yagombaga kwishyurwa miliyoni 139 ariho buhera bubashinja iki cyaha.

Abaregwa ariko bagaragarije urukiko ko amafaranga yose yagombaga kwishyurwa Rwiyemezamirimo n’ubundi ari miliyoni 174 ariko havanwamo amafaranga yahawe mbere y’uko atangira imirimo ndeste n’imisoro hagasigara miliyoni 139 ari nazo zishyuwe, bityo icyaha bashinjwa kikaba ngo nta shingiro gifite.

Mbere y’ipfundikirwa ry’urubanza ubushinjacyaha bwasabiye ibihano abaregwa, maze Gacinya Chance Denis bumusabira igifungo cy’imyaka 6 naho Mataha J Paul asabirwa igifungo cy’imyaka 7 n’ihazabu ya miliyoni 2 z’amafaranga y’u Rwanda buri wese.

Urukiko rubajije impamvu ibihano basabirwa birutanwa, ubushinjacyaha bwasobanuye ko kubera ko ngo ibyaha byose byakozwe Mataha yabaye nyirabayazana wabyo kuko ngo yemezaga ibyishyuzwaga niyo mpamvu ariwe wasabiwe igihano kiri hejuru.

Urukiko rwavuze ko uru rubanza ruzasomwa tariki ya 22 z’ukwezi gutaha kwa Gatanu i saa Cyenda z’amanywa nkuko Rwandadailynews banditse iyi nkuru babivuga.

PNG - 776.1 kb
Gacinya Chance Denis wari Visi Perezida wa Rayon Sports yatawe muri yombi ku wa 19 Ukuboza 2017 bisabwe n’Ubushinjacyaha akurikiranyweho icyaha cyo kubeshya uwo bagiranye amasezerano.

Source: RBA ishami rya Rusizi





Tanga igitekerezo kuri iyi nkuru



Igitekerezo
Peter Kuya 25-04-2018

Akarere ka Rusizi kavugwamo Ruswa cyane mu gutanga akazi mu gutanga amasoko!Hazakorwa icyi?.Ko urwo rubanza rwa Gacinya turushimye;abandi bayanyereje bagafungurwa ngo bararwaye cg ngo bagiye kwita ku miryango yabo ibyo bite abo ni abahoze bayobora ADEPR (Tom Rwagasana ,Sibomana n’abagenzi babo)