Fellaini wakiniye Man United yanduye COVID-19

Uwahoze ari umukinnyi wa Manchester United na Everton zo mu Bwongereza ndetse akaba anakinira ikipe y’igihugu y’u Bubiligi, Marouane Fellaini yanduye icyorezo cya Coronavirus cyibasiye abatari bake ku Isi.

Marouane Fellaini yabaye umukinnyi wa mbere ukina muri Shampiyona y’Icyiciro cya Mbere mu Bushinwa, ufashwe n’icyo cyorezo.

Fellaini w’imyaka 32, yanduye nyuma y’uko yari yasubiye mu Bushinwa, mu Ntara ya Jinan, ahabarizwa ikipe ya Shandong Luneng akinira.

Inzego zishinzwe ubuzima muri Janan, zemeje ko uyu mukinnyi yanduye Coronavirus nyuma y’iminsi ibiri gusa ahageze na gari ya moshi, aho yagombaga kumara iminsi 14 mu kato nk’umuntu uvuye mu Burayi.

Marouane Fellaini akinira Shandong kuva mu 2019, aho yanagize umwaka mwiza w’imikino, atsinda ibitego 13 muri Shampiyona, ikipe ye isoza iri ku mwanya wa gatanu muri Super League y’u Bushinwa.

Byitezwe ko Shampiyona y’u Bushinwa kuri ubu yahagaritswe nyuma y’uko iki gihugu ari cyo cyatangiriyemo icyorezo cya Coronavirus, ishobora gusubukurwa tariki ya 18 Mata, akaba ari nayo mpamvu Fellaini yari yasubiyeyo.

Coronavirus ikomeje kwibasira abantu batandukanye idasize abakinnyi, abatoza n’abayobozi b’amakipe y’umupira w’amaguru.

Kuwa Gatandatu tariki ya 21 Werurwe 2020, nibwo Paulo Dybala ukinira Juventus yo mu Butaliyani, yemeje ko we n’umukunzi we, Oriana, bombi banduye Coronavirus.

Dybala yabaye umukinnyi wa gatatu wa Juventus wanduye iki cyorezo nyuma ya Daniel Rugani na Blaise Matuidi.

Icyo cyorezo cyahitanye kandi uwahoze Perezida wa Real Madrid, Lorenzo Sanz witabye Imana ku wa Gatandatu.


Marouane Fellaini yagaragayeho Coronavirus nyuma y’iminsi ibiri asubiye mu Bushinwa

Abari gusenyerwa mu Kagari ka Nyarutarama bati "Bazane imbunda baturase, ngo ntibakitaye kuri Coronavirus yugarije u Rwanda ndetse n’Isi, ngo COVID-19 ni ibyo bari gukorerwa, indwara twayihinduye ibingibi, ntabwo indwara tukiyitayeho:





Tanga igitekerezo kuri iyi nkuru



Igitekerezo