Ese koko ni iki kihishe inyuma yo gusezera kwa Nshuti Savio muri AS Kigali budakeye kabiri?

Nyuma yuko Nshuti Dominique Savio, umukinnyi w’ikipe y’igihugu Amavubi amaze kwandikira ikipe ya AS de Kigali ibaruwa isesa amasezerano n’iyi kipe atayimazemo kabiri dore ko ayimazemo amezi 6 gusa, byamenyekanye ko iyi kipe hari bimwe mu bikubiye mu masezerano bagiranye ku itariki ya 26/6/2017 itubahirije birimo kumuha inzu ye bwite.

Learn how to Thrive

Mu ibaruwa Savio Nshuti uhagarariwe na Ricard Sports Corporation yandikiye ikipe ya AS Kigali, yatangaje ko basheshe amasezerano kuko Perezida w’iyi kipe KANYANDEKWE Pascal hari ingingo atubahirije mu masezerano bagiranye ku itariki yavuzwe hejuru.

Iyi ikaba ari ingingo ya gatatu y’amasezerano hagati y’impande zombi, yavugaga ko Nshuti Dominique Savio azahabwa inzu ye bwite nyuma ya amezi ane (4) ashyize umukono kumasezerano muri AS Kigali.

Aha nyuma y’amezi atandatu babisinyiye, iyi baruwa yanditswe tariki ya 28/12/2017 ivuga ko kuba ibi bitarashyizwe mubikorwa bahisemo guhita basesa amasezerano yose bari bafitanye na AS Kigal nkuko ingingo ya 11 ibisobanura mu masezerano ko mugihe imwe mu ngingo ikubiye mu masezerano yaba itubahirijwe bemerewe guhita basesa amasezerano.

Ibi Savio wari umaze amezi atandatu yonyine muri As Kigali, akaba yabikoze mu gihe nyamara iyi kipe yari imaze igihe imuvuza urutugu yari amaranye igihe akiniraho, ikintu cyatumye amara igihe atagaragara muri shampiyona.

Ku ruhande rw’ikipe ya As Kigali, umutoza wayo Eric Nshimiyimana yatangaje ko aya makuru atayazi gusa ko atekereza ko ibyo bintu bitashoboka ku mukinnyi ufite amasezerano. Joseph Nshimiye umunyamabanga mukuru w’iyi kipe na we akaba yunze mu ry’umutoza we.

Yagize ati: “Ayo makuru ndi kuyumvana abanyamakuru. Nta kintu twari twamenya nta n’ikibazo twari dufitanye na Savio. Nkimara kuyumva nagerageje kumuhamagara ariko telefone ye ntabwo yari iriho”.

RuhagoYacu na yo ikaba yagerageje kuvugana na Savio Nshuti gusa telefone ngendanwa ye ikaba itabonekaga.

Nshuti Dominique Savio yasinyiye As Kigali amasezerano y’imyaka itatu, yemererwa inzu, imodoka hamwe na miliyoni 16 z’amafaranga y’u Rwanda.

Uyu yari yavuze ko yemeye gusinyira As Kigali kuko ari yo yemeye kumuha ibyo yari yamusabye byose harimo ko nihagira ikipe yo hanze imushaka As Kigali yahita imusezera, gusa ni mu gihe ikipe imushaka yemeye gutanga ibihumbi 80 by’amadorali.

Daniel MUKESHIMANA/Umubavu.com


Travel for Free!


Tanga igitekerezo kuri iyi nkuru



Igitekerezo