Ese Chelsea irivana mu maboko ya Arsenal idafite Morata na Fabregas?

Mu mukino wo gushaka itiki yo kwerekeza ku mukino wa nyuma y’igikombe cy’igihugu cy’u Bwongereza (English Football League Cup) uteganyijwe mu ijoro ry’uyu munsi, ikipe ya Chelsea irakina idafite Alvaro Morata na Fabregas byatumye hibazwa niba irabasha kwivana mu maboko ya Arsenal dore ko iraba ikinira Emirates Stadium mu mukino wo kwishyura.

Mu mukino ubanza aya makipe yombi yaguye miswi (ubusa ku busa) ku kibuga cya Chelsea Stamford Bridge muri iyi mikino y’igikombe cy’igihugu cy’u Bwongereza mu gihe Manchester City yo yaraye igeze ku mukino wa nyuma itsinze Bristol City ibitego 3 kuri 2 ikaba itegereje iyo bizahurira ku mukino wa nyuma ubwo Arsenal na Chelsea ziraba zisobanura muri uyu mukino utaraba woroshye na gato utegerejwe saa yine z’ijoro.

Biribazwa niba Chelsea yananiwe gutsindira ikipe ya Arsenal ku kibuga cyayo Stamford Bridge ifite Alvaro Morata na Fabregas iraza kwivana imbere ya Arsenal idafite aba basore mu gihe nayo iraba ikinira imbere y’abafana bayo.

PNG - 787.5 kb
Umutoza Antonio Conte yemeje ko arakina na Arsenal adafite abasore be, Alvaro Morata na Fabregas


Umutoza Antonio Conte yagize ati “Alvaro Morata na Fabregas ntibahari ku mukino wacu na Arsenal. Ngomba gushaka uburyo ndakemura iki kibazo. Morata afite ikibazo cy’umugongo”.

Nubwo hari kuvugwa Chelsea irakina idafite aba basore bayo, Arsenal nayo ntawakwirengagiza ko ifite icyuho gikomeye cyo kuba irakina idafite Alexis Sanchez wafatwaga nk’umukinnyi ngenderwaho mu ikipe, kuri ubu wamaze kwerekeza muri Manchester United mu buryo benshi n’ubu batemeranyaho n’umutoza Arsene Wenger bavuga ko yagombaga kumuha ibyo yifuza ariko ntagende.

Gusa nubwo hibazwa ibi, ntawakwirengagiza ko izi kipe zombi zamaze gukura amaso ku gikombe cya Shampiyona (Premier League) igenda ikozwaho imitwe y’intoki n’ikipe ya Manchester City dore ko iyoboye urutonde rw’agateganyo n’amanota 65 yose mu gihe iyikurikiye ariyo Manchester Unity irushwa amanota 12 yose.

Ikipe irarokoka hagati ya Arsenal na Chelsea kuri uyu mugoroba, irasanga Manchester City imaze gutanga ubutumwa muri Premier League yanamaze kugera ku mukino wa nyuma y’iki gikombe.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo