Byitezwe ko Barcelona igena Koeman nk’umutoza mushya

Barcelona yaraye yirukanye ku butoza Quique Setién, hashize iminsi itatu iyi kipe ikojejwe isoni na Bayern Munich yayinyagiye ibitego 8 - 2 muri kimwe cya Kane cya Champions League.

Ronald Koeman, Umuholandi utoza ikipe y’igihugu y’u Buholandi wanakiniye Barcelona hagati y’umwaka wa 1989 na 1995, byitezwe ko asimbura Setién ku gutoza iyi kipe ikinira i Nou Camp.

Setién w’imyaka 61 wahoze atoza Real Betis, yari yahawe akazi ko gutoza Barcelona mu kwezi kwa mbere, akaba ayitoje imikino 25 gusa.

Barça yarangije shampiyona ya La Liga iri ku mwanya wa Kabiri, irushwa amanota atanu na Real Madrid

Iyi kipe yavuze ko umutoza mushya azatangazwa "mu minsi iri imbere".

Ubwo Bayern yatsindaga Barcelona ku wa Gatanu ushize, bwari bubaye ubwa Kane mu myaka itanu ishize iyi kipe isezerewe muri kimwe cya Kane cy’iri rushanwa risumba ayandi i Burayi.

Ubwo yari amaze gutsindwa, umutoza Setién, wari wasimbuye Ernesto Valverde, yavuze ko igihe kigeze ngo "twisuzume dufate ibyemezo bicyenewe kuri ejo hazaza".

Nyuma yo kumwirukana ejo ku wa mbere, ubuyobozi bwa Barcelona bwagize buti "Iki ni icyemezo cya mbere muri gahunda ndende yo kuvugurura ikipe nkuru".

Iyi kipe yanatangaje ko amatora ya Perezida mushya w’iyi kipe ateganyijwe kuba mu kwezi kwa Gatandatu umwaka utaha, yigijwe imbere akazaba ku itariki ya 15 y’ukwa Gatatu

Gerard Piqué, myugariro wa Barcelona, yavuze ko yaba "uwa mbere mu kugenda" iyi kipe iramutse ishatse gukora impinduka.

Isesengura rya Guillem Balagué, impuguke mu mupira w’amaguru wa Espagne, mu kiganiro Radio 5 Live cya BBC

Koeman agiye guhabwa amasezerano y’imyaka ibiri. N’ay’umwaka umwe ubusanzwe yari kuyemera. Amaze igihe kirekire agerageza kugera muri Barcelona.

Mauricio Pochettino wahoze atoza Tottenham yegerewe n’iyi kipe ndetse habayeho n’ibiganiro, nubwo umukuru w’ikipe yasanze abafana batamukunda [nk’uwahoze akinira akanatoza ikipe mucyeba ya Espanyol].

Pochettino ni we mahitamo meza kurushaho. Ibi nta kubishidikanyaho.

Ariko aha ntituri kuvuga ku kibazo nyakuri. Ikipe idafite umurongo, ifite umwenda (ideni) bamwe bavuga ko ushobora kuba ugera kuri miliyoni 700 z’ama-euro, idashobora gutera intambwe kuko itanga 70% by’inyungu ibonye bikagenda ku mishahara y’ikipe nkuru.

Nta gitekerezo ifite gisobanutse cyaho igiye kwerekeza, ku ruhande rumwe bitewe nuko idashobora kwikiza aba bakinnyi, ku ruhundi ruhande kubera ko nta cyerekezo ifite.


Barcelona igitozwa na Quique Setién yatsinzwe ibitego umunani, bwa mbere guhera mu kwezi kwa Kane mu 1946


Ronald Koeman witezwe kwemezwa nk’umutoza mushya wa Barcelona

Umuvugabutumwa uzwi nka Mama Charlene yigaramye ibiri kuvugwa n’umugabo we, ngo yavuze ijambo ntiyavuga ubugambo, menya ikibyihishe inyuma byose muri iyi Video utapfa gusanga ahandi:





Tanga igitekerezo kuri iyi nkuru



Igitekerezo