Amafoto ya Beyoncé ahetswe kuri moto mu myambarire idasanzwe yasusurukije abantu

Umuhanzikazi Beyoncé n’umugabo we Jay-Z bo muri Leta Zunze Ubumwe za Amerika batunguye abatuye mu Mujyi wa Kingston muri Jamaica ku mugoroba wo ku wa Kabiri, bigaragaza kuri moto biteza impagarara ku mihanda abaturage bafata amafoto y’urudaca.

Aba bombi baherukaga gutangaza ko bagiye gukora urugendo rw’ibitaramo bikomeye bahuriyeho byiswe ‘On the Run II tour’. Icyacyetswe nk’ikiruhuko bajyanyemo n’umuryango muri Jamaica cyahindutse ibihe by’akazi gashya no gutungura abatuye muri icyo gihugu bamazemo iminsi.

E! News yatangaje ko ‘bafataga amashusho y’umushinga mushya bahuriyeho’. Abantu batandukanye biboneye imbonankubone Jay-Z atwaye Beyoncé kuri moto babwiye iki kinyamakuru ko umugore yagendaga apepera abaturage abereka ikimenyetso cyo kubasoma.

Abantu batandukanye banyuzweho n’ibi byamamare ku muhanda barunze amafoto y’aba bahanzi ku mbuga nkoranyambaga cyane cyane kuri Twitter bagaragaza ko bishimiye uruzinduko rwabo muri icyo gihugu. Andi makuru avuga ko banakoraniyeyo indirimbo n’umuhanzikazi SZA.

Itangazamakuru ryo muri Jamaica ryanditse ko Jay-Z na Beyoncé bajyanyeyo n’abana babo ndetse n’umukozi ushinzwe kubitaho. Uyu muryango uzamara iminsi uri mu icumbi bwite.

Uruzinduko rwa Jay-Z na Beyoncé muri Jamaica rwatunguranye kuko bari bamaze igihe gito bagaragaye mu bindi birori bya “2018 Wearable Art Gala” byabereye mu Mujyi wa Los Angeles.

PNG - 1.1 Mb
Jay Z na Beyonce bari kwitegura urugendo rw’ibitaramo bikomeye bazakorana ku migabane itandukanye


Jay-Z na Beyoncé batangiye imishinga mishya muri Jamaica nyuma y’iminsi bemeje imijyi izaberamo ibitaramo byabo, bazanyura muri Seattle, Amsterdam, Los Angeles n’ahandi hatandukanye. Byitezwe ko bazatangirira urwo rugendo i Cardiff muri Wales mu bihe by’impeshyi bakarushyiraho akadomo mu Ukwakira.

PNG - 1 Mb
Abantu batandukanye bafotoraga aba bombi

Daniel MUKESHIMANA@Umubavu.com





Tanga igitekerezo kuri iyi nkuru



Igitekerezo