Abafana ba Arsenal barabyinira ku rukoma nyuma yo kubura Sanchez bakibikaho Rihanna

Nyuma yuko Sanchez wafatwaga nk’umukinnyi ngenderwaho mu ikipe ya Arsenal afashe icyemezo cyo kwerekeza muri Manchester United, abakunzi b’iyi kipe bari batangiye guhangayika kubera kubura uyu mukinnyi dore ko yanabatsindira ibitego cyane ariko kuri ubu barabyinira ku rukoma bavuga ko ngo nta gihombo iyi kipe yabo ifite kuko yungutse cyane nyuma yuko haje Pierre-Emerick Aubameyang ndetse hakiyongeraho n’umuhanzikazi w’icyamamare Rihanna.

Nyuma y’igenda rya Sanchez, yasise asimbuzwa Pierre-Emerick Aubameyang wanatsinze igitego cye cya mbere ku mukino we wa mbere ikipe ya Arsenal yakinagamo na Everton ubwo bayinyagiraga ibitego 5 byose kuri 1. Ubwo uyu mukino wabaga, umuhanzi Rihanna yari yicaye mu mwanya w’icyubahiro awureba.
Ubundi ntibisanzwe ko uyu muhanzikazi ajya kureba umupira w’amakipe yahuye akina ariko yagaragaye ku kibuga cy’ikipe ya Arsenal, Emirates Stadium bamwe batangira kuvuga ko yabaye umufana ukomeye w’iyi kipe.
Umukino urangiye, Rihanna yamanutse mu kibuga yifotoranya amafoto n’abakinnyi batandukanye barimo Ozil, Laurent Koscielny, Sead Kolasinac na Shkodran Mustafi.

Ozil yanditse ku rubuga rwe rwa twitter avuga ko ataratsindwa na rimwe umuhanzi Rihanna yaje kureba ikipe ashingiye ko ubwo ikipe y’u Budage (Germany) yakinaga Finale n’ikipe y’igihugu ya Argentina nabwo yari yaje kureba uwo mukino.
Gusa muri uyu mukino wa Arsenal ikina na Everton, umukinnyi Ozil ntiyashoboye gutsindamo igitego mu bitego 5 Arsenal yatsinze Everton ahubwo Pierre-Emerick Aubameyang yatsinze igitego cye cya mbere ku mukino we wa mbere akinira Arsenal.
Bamwe mu bafana b’ikipe ya Arsenal bavuze ko baticuza ko Sanchez yagiye muri mukeba Man. United kuko bungutse cyane kurusha aho yagiye.
Umwe mu bafana ba Arsenal twaganirye yagize ati “Twe nta gihombo twagize n’ubwo twari twagize ubwoba kuko yari adufitiye runini ariko nyuma yo kugenda twungutse Aubameyang kandi yaratsinze kandi tubona azakomeza gutsinda ndetse twungutse umuhanzi w’icyamamare Rihanna twaramubonye yaje kureba umukino ndetse twunguka na Henrikh Mkhitaryan”.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo