Bimwe mu bisa nk’ibitangaza byahanzwe n’abo hambere Isi ya none itapfa kugeraho

Abahanga bavuga ko isi imaze imyaka irenga Miliyari 4.5 ibayeho n’ikiremwamuntu gituyeho. Kugira ngo umuntu agende yororoka ku isi, yanyuze mu rugendo rurerure cyane rwarimo ndetse rurimo byinshi bitandukanye kugeza aho ageze uyu munsi.

Iyi si n’abantu bayituye kuva kera, bagiye barangwa n’ibintu bitandukanye umuntu atarondora ngo abivemo ariko hari bamwe mu bantu tugarukaho babayeho kera yewe na mbere ya Yesu bakoze ibisa n’ibitangaza Isi ya none n’ikoranabuhanga ifite batapfa kugeraho nubwo bibwira ko ubu aribwo bari mu gihe cy’iterambere rikomeye n’ubwenge buhambaye.

Umubavu.com twaguteguriye ibitangaza 7 bitazibagirana ku Isi harimo n’aho Umwami Nebukadinezari yashyingiriwe:

1. Imva z’Abami bo mu Misiri

Mu mwaka wa 2008, abanyamateka bemeje ko mu Misiri Pyramids zose zaba zarahubatswe ari 118. Kugeza ubu zimwe zagiye zangirika ariko izigihari ziherereye ahitwa I Giza (Great Pyramids) zikaba zisurwa na ba mukerarugendo bavuye impande n’impande. Izi mva zubatswe mu myaka 2560 mbere y’ivuka rya Yesu.

2. Ubusitani bw’i Babuloni (Hanging Gardens of Babylon)

Ubu busitani bw’agatangaza bwari buherereye muri Irake (Iraq) y’ubu bwari bwubakanywe ubuhanga buhanitse kuko ibiti, ibyatsi birandaranda hasi iyo wabyitegeraga ukiri kure byagaragaraga nk’umusozi w’icyatsi wubakishijwe amatafari.

Bivugwa ko Umwami Nebukadinezari ari we waba yarabwubatse akanahashyingirirwa. Ku bazi Umunara w’I Babeli uvugwa muri Bibiliya, ni aha wari uherereye.

3. Ikibumbano cyitiriwe ’RHODES’ (Clossus of Rhodes)

Iki ni ikibumbano cy’ikigirwamana cy’Abagiriki cyari gihagarariye izuba, cyari cyubatse mu mugi wa Rhodes mu kirwa cy’Abagiriki mu myaka 280 mbere y’ivuka rya Yesu. Iki kibumbano cyubatswe ubwo Abagiriki bari bamaze gutsinda Antigonus wa 1: Umutingito ni wo wagikuye ku isi.

4. Urusengero rwa ’ARTEMIS’

Abantu benshi ntibabizi ariko uru rusengero na none barwitaga “Temple of Diana”, Abagiriki bari bararuhaye ikigirwamanakazi cyitwaga Artemis. Rwari ruherereye muri Ephesus ubu akaba ari muri Turukiya. Mu kinyejana cya 7 uru rusengero rwasenywe n’umwuzure.

5. Imva ya ’MAUSOLUS’ (Mausoleum at Halicarnassus)

Iyi mva yari ifite uburebure bwa Metero 45 ikaba yari ihagarariye ku nkingi 4 z’ibitabashwa. Ubwo uyu Mausolus yari akiri ku butegetsi, we ubwe yategetse ko hubakwa imva azashyingurwamo we n’umugore we, ibi byatumye ijambo Mausoleum rikoreshwa mu kugaragaza imva yubatswe hejuru y’ubutaka.

6. Agasongero kitiriwe ’ALEXANDRIA’

Mu binyejana byinshi iyi nyubako y’Abanyamisiri yabaye inyubako ndende yubatswe n’umuntu ku isi. Yari yubatswe hafi y’inyanja kandi ifite itara ku gasongero, iri tara ryaburiraga amato ngo yabaga agiye kugonga ibibuye byo mu mazi. Aka gasongero kaje gusenywa n’imitingito 3 ikomeye.

7. Ikibumbano cyitiriwe ’ZEUS’

Iki igishushanyo cy’ikigirwamana cyari cyubatse I Olympia, cyari kicaye gifite uburebure bwa Metero 13. Cyubatswe n’umushushanyi w’Umugiriki witwaga Phidias ahagana muri 435 mbere y’ivuka rya Yesu. Iki gishushanyo gisigariye ku biceri by’Abagiriki nyuma yo gutwikirwa I Constantinopole.

Impamvu ibi bitangaza bitabaye undi mubare wose uretse karindwi, ni uko uyu mubare wagaragazaga ubwuzure mu isi ya kera kandi wagaragazaga imibumbe 7 yonyine yari izwi icyo gihe.

@Umubavu.com





Tanga igitekerezo kuri iyi nkuru



Igitekerezo
Nkurunziza Kuya 1-08-2019

None murivyo havuyemwo pyramids hasigay ivyqh