Wari uziko hari abayobozi bafashe ibibanza mu tubari ?

Umuyobozi w’Akarere ka Nyaruguru, Habitegeko Francois, yihanangirije abayobozi b’inzego z’ibanze bafite ingeso mbi zo kwiyandarika, ubusinzi na ruswa, ababwira ko bakwiye kuva mu nzira aho gukomeza kubera abaturage ibisitaza.

Yabivuze kuri uyu wa Gatatu tariki ya 29 Kanama 2018, ubwo hasinywaga imihigo hagati y’ubuyobozi bw’akarere ka Nyaruguru n’Abanyamabanga Nshingwabikorwa b’imirenge ndetse n’abafatanyabikorwa.

Mu kwesa imihigo ya 2017/2018, Akarere ka Nyaruguru kabonye umwanya udashimishije wa 24 mu turere 30. Yavuye ku mwanya wa 15 mu mwaka wari wabanje.

Habitegeko yaburiye abayobozi bakorana anabasaba gukora kinyamwuga bakareka amagambo no kwirirwa mu nzoga kandi udashoboye akarekura akajya mu bindi.

Ati “Abafite ingeso mbi, kwiyandarika, abantu bafashe amapaji mu kabari, saa sita ukagenda ugasanga Gitifu w’Umurenge akutse Primus, kurya bitanu by’umuturage ngo umuhe Girinka, kumurya bibiri ngo urangize urubanza rwe, nta mikino”.

Yababwiye ko uwumva adafite ubushake bwo gufasha abaturage no gukora nk’uwikorera yabivamo akajya ku ruhande mu byo ashoboye.

Ati “Niba ari wowe kibuye abaturage basitaraho ngo batagera aho bagomba kugera, va mu nzira”.

Bamwe mu baturage bo mu Karere ka Nyaruguru bavuga ko kuba barasubiye inyuma mu mihigo biterwa no kuba bategerwa na bamwe mu bayobozi n’imyumvire ikiri hasi.

Umwe yagize ati “Niba bavuze ngo dukoreshe amafumbire ugasanga ntabwo tuyakoresha nk’uko bikwiriye; hari n’ikindi mbona kidusubiza inyuma kuko hari nk’abayobozi batatwegera bakigira mu biro gusa bakavamo bigira mu tubari kwinywera”.

Mu mwaka w’imihigo wa 2018/2019, Akarere ka Nyaruguru gafite imihigo 64 irimo 25 yo mu bukungu, 27 ijyanye n’imibereho myiza, na 12 ijyanye n’imiyoborere myiza.

Iyo mihigo yose izatwara ingengo y’imari isaga miliyari 16 z’amafaranga y’u Rwanda.

Abanyamabanga Nshingwabikorwa b’imirenge 14 igize Akarere ka Nyaruguru biyemeje ko bagiye guhindura imikorere ikarushaho kuba myiza, ku buryo ubutaha bazaza mu myanya ya mbere mu kwesa neza imihigo.

Source: Igihe.com

Umubavu.com





Tanga igitekerezo kuri iyi nkuru



Igitekerezo