Visi-Perezida wa Zimbabwe yagizwe na Minisitiri w’Ubuzima

Visi-Perezida wa Zimbabwe Constantino Chiwenga yagizwe na Minisitiri w’Ubuzima, hashize hafi ukwezi iyi Minisiteri yugarijwe n’ibivugwa ko ari ibibazo by’uburiganya mu kugura ibikoresho byo kurwanya Coronavirus.

Bwana Chiwenga wahoze ari Jenerali akaba n’umukuru w’ingabo z’iki gihugu, yanayoboye ibikorwa bya gisirikare byo guhirika ku butegetsi Robert Mugabe wari Perezida.

Obadiah Moyo, wamubanjirije muri iyo Minisiteri y’Ubuzima, yagejejwe mu rukiko mu kwezi kwa Gatandatu ashinjwa ibirego bya ruswa bijyanye na kontaro ya miliyoni 20 z’amadolari yahawe kompanyi yo muri Hongrie.

Bivugwa ko iyo kontaro yatanzwe bitanyuze mu nzira ziboneye.

Yabaye afunguwe by’agateganyo.

Itangazo ry’ejo ku wa Kabiri ryasohowe n’Ibiro bya Perezida rigira riti "Perezida Mnangagwa yabonye ukuntu bicyenewe byihutirwa ko ibijyanye no kwita ku buzima bishyirwa ku murongo mu rwego rw’icyorezo cya Covid-19 aho igihugu cyagize ukwiyongera bikomeye kw’imibare".

Kugeza ubu muri Zimbabwe habarurwa abanduye Coronavirus bagera ku 4221, muri bo 81 yarabishe nkuko imibare ya Kaminuza ya Johns Hopkins yo muri Amerika ibigaragaza.

Ariko byibazwa ko umubare nyakuri ushobora kuba urenga kubera ubushobozi bucye bwo gupima cyo kimwe no mu bindi bihugu bimwe na bimwe ku isi.


Visi-Perezida Constantino Chiwenga yitezweho gushyira Minisiteri y’Ubuzima ku murongo





Tanga igitekerezo kuri iyi nkuru



Igitekerezo