Uwari umusirikari wa Uganda akaza gutoroka yakubiswe n’abaturage kugeza apfuye bamuziza ubujura

Umugabo w’imyaka 40 wahoze mu gisirikare cya Uganda akaza kugitoroka, yakubiswe n’abaturage kugeza ashizemo umwuka bamuziza gushaka kubiba.

Mu ijoro ryo ku wa Gatanu tariki 6 Mata 2018, nibwo umugabo witwa David Kanyamahoro ushinjwa gutoroka igisirikare cya Uganda (UPDF), hamwe n’abandi batatu bagiye kwiba muri Village ya Nyagicyebe/ Rwaramba muri District ya Kisoro, abandi baracika we afashwe arakubitwa kugeza ubwo ashizemo umwuka.

Nk’uko bitangazwa n’ikinyamakuru Chimpreports cyo muri Uganda, ngo ahagana saa tanu z’ijoro nibwo bigabye mu rugo rw’umuturage witwa David Mugisha, bitwaje icyuma, ipiki, umuhoro n’igitiyo, ubwo bagundaguranaga n’abo mu muryango, byaje kumenyekana ko yahoze mu gisirikare ataragitoroka, bamuviraho inda imwe n’abaturanyi, baramukubita kugeza ashizemo umwuka.

Umuyobozi wa Polisi muri Kisoro, Charles Okoto watanze aya makuru, avuga ko umurambo wa David Kanyamahoro wajyanwe mu buruhukiro bw’ibitaro bya Kisoro.

Mugisha n’umugore we nabo bakaba barakomerekeye muri iyo mirwano. Polisi ikaba irimo gukora iperereza inashakisha abandi bari kumwe n’uyu musirikare wishwe.

Daniel MUKESHIMANA@Umubavu.com





Tanga igitekerezo kuri iyi nkuru



Igitekerezo