Utavuga rumwe na Leta ya Tanzania yafunzwe, ngo yatewe ubwoba ko azicwa

Ishyaka ritavuga rumwe n’ubutegetsi muri Tanzania ryamaganye ifungwa ry’umukuru waryo Zitto Kabwe, rivuga ko ari igikorwa cy’ikandamiza n’iterabwoba mbere y’amatora yo mu kwezi kwa cumi.

Ishyaka Alliance for Change and Transparency (ACT) rivuga ko Bwana Kabwe, na barindwi muri bagenzi be, bashinjwa na polisi inama itemewe n’amategeko.

Itangazo ry’iri shyaka rivuga ko polisi yinjiye mu nama yemewe y’iri shyaka ahitwa Linde mu majyepfo ashyira uburasirazuba, ikabata muri yombi ku byaha bihimbano.

Mu kwezi kwa cumi hateganyijwe amatora y’umukuru w’igihugu muri Tanzania.

Bwana Kabwe mu minsi ishize yumvikanye kenshi anenga leta ya Tanzania ku migirire yayo imbere y’icyorezo cya Coronavirus.

Mu kwezi kwa Kabiri yatangaje ko yatewe ubwoba ko azicwa, nyuma y’uko we n’izindi mpirimbanyi zisabye Banki y’isi guhagarika inguzanyo kuri Tanzania, zivuga ko ari ugufasha "politiki y’ivangura" ibuza abakobwa batwite kujya mu ishuri.

Perezida John Magufuli, witezweho kwiyamamariza manda ya kabiri, mu cyumweru gishize yasheshe inteko mbere y’uko hatorwa abayigize bashya.

Abatavuga rumwe n’ubutegetsi bavuga ko kubakandamiza byiyongereye kuva Bwana Magufuli yajya ku butegetsi mu 2015, ko kuva icyo gihe kandi n’itangazamakuru ryigenga ryatangiye kwibasirwa.


Zitto Kabwe mu kwezi kwa Kabiri yavuze ko yatewe ubwoba ko azicwa

Kwa Barafinda baravuza impundu ariko zicagase, ubuzima bwa Barafinda n’andi makuru menshi k’UMUBAVU TV ONLINE:





Tanga igitekerezo kuri iyi nkuru



Igitekerezo