Uruhinja rw’amasaha 30 rwasanganywe Coronavirus mu Bushinwa

Uruhinja rwo mu Bushinwa ruherutse kuvuka rwasanganywe Virusi ya Coronavirus hashize amasaha 30 gusa ruvutse, akaba ri we muntu muto cyane usanganywe iyo virusi, nkuko bivugwa n’igitangazamakuru cya Leta.

Uwo mwana yavutse ku itariki ya Kabiri y’uku kwezi kwa Kabiri mu bitaro by’i Wuhan, aho hakaba ari naho hafatwa nk’izingiro ry’iyo virusi.

Nyina w’uwo mwana yari yasanganywe iyo virusi mbere yuko abyara uwo mwana.

Abana bacye gusa ni bo bamaze gusanganwa iyo virusi, imaze kwica abantu 563 naho abandi 28,018 bakaba bamaze kuyandura.

Igitangazamakuru Xinhua cya Leta y’u Bushinwa cyatangaje amakuru yo kwandura coronavirus k’uwo mwana mu ijoro ryo ku munsi w’ejo ku wa Gatatu.

Cyongeyeho ko uwo mwana, wavutse apima 3.25kg, ubu uburwayi bwe bwahamishijwe ku kigero kimwe kandi ko ari gukurikiranirwa hafi.

Uwo mwana yaba yayaranduye ate?

Impuguke mu buvuzi zivuga ko bishoboka ko uwo mwana yaba yarayanduriye mu nda ya nyina.

Zeng Lingkong, muganga mukuru ku bitaro bivura abana by’i Wuhan mu ishami ryita ku buzima bw’abana mbere yuko bavuka, yabwiye ibiro ntaramakuru Reuters ati:

"Ibi biratwibutsa kwita ku kuba umubyeyi ashobora kwanduza coronavirus umwana".

Ariko biranashoboka ko uwo mwana yayanduye nyuma yo kuvuka kubera kuba hafi ya nyina.

Stephen Morse, impuguke mu ko indwara zandura wo kuri Kaminuza ya Columbia muri Amerika mu ishuri ryiga ku buvuzi bw’indwara z’ibyorezo rya Mailman School of Public Health, yabwiye igitangazamakuru Business Insider ati:

"Birashoboka cyane ko uwo mwana yayanduye mu buryo busanzwe - ahumeka umwuka urimo virusi uvuye mu gukorora kwa nyina".

Birasanzwe ko abana bandura Coronavirus?

Abana bacye cyane basanganywe ubu bwoko bushya by’iyi virusi muri iki cyumweru, bikaba bihuye n’ibyabaye mu gihe cy’andi moko ya coronavirus yabayeho arimo nka Sars na Mers.

Icyegeranyo cy’ikinyamakuru ku bushakashatsi mu buvuzi cyo muri Amerika, American Medical Association (JAMA), kigaragaza ko muri rusange abari kwandura ubu bwoko bushya bw’iyi virusi ari abafite hagati y’imyaka 49 na 56 y’amavuko.

Icyo cyegeranyo cyongeraho ko kugeza ubu abana "badakunze kuyandura".

Ni cyo kimwe no mu gihe virusi ya Mers yateraga mu mwaka wa 2016.

Icyo gihe ikinyamakuru cy’ubushakashatsi ku buvuzi bw’abana cya World Journal of Clinical Paediatrics cyavuze ko idakunze kugaragara mu bana.

Cyongeyeho ko impamvu ituma abana batandura cyane itazwi.

Umwana w’amezi atandatu wo muri Singapour bizwi ko yasanganywe ubu bwoko bushya bwa coronavirus, cyo kimwe n’umwana w’imyaka umunani ukomoka i Wuhan kuri ubu uri muri Australia.

Iyo virusi yageze no mu bihugu bimwe byo ku isi, mu bihugu 25 hamaze gutangazwa ko abantu 191 bayanduye nubwo kugeza ubu abantu babiri gusa ari bo bazwi imaze guhitana hanze y’u Bushinwa.

Coronavirus ituma bigorana cyane guhumeka ndetse akenshi ibimenyetso byayo bitangira ari uguhinda umuriro, hagakurikiraho gukorora ariko nta gikororwa kiza gifatika.

Benshi mu bayandura baba bashobora kuyikira nkuko bigenda iyo umuntu arwaye ibicurane.

Ni iki kindi kiri kuba kubera Coronavirus?

Ishami ry’Umuryango w’Abibumbye ryita ku buzima (OMS/WHO) ryatangaje ko ubu bwoko bushya bwa coronavirus ari icyorezo cyugarije isi.

Tedros Adhanom Ghebreyesus, umukuru wa OMS, ejo ku wa Gatatu yasabye amahanga inkunga ya miliyoni 675 z’amadolari y’Amerika yo gufasha muri gahunda y’amezi atatu yo guhangana n’iyi virusi.

Yavuze ko igice kinini cy’iyo nkunga cyajyanwa mu bihugu bicyeneye imfashanyo yo kwirinda iyo virusi. Ibikoresho 500,000 byo kwipfuka n’ibindi 40,000 byo guhumekeramo byakorehezwa mu bihugu 24.

Abategetsi b’u Bushinwa bavuga ko bongereye ibikorwa byo guhagarika iyi virusi, by’umwihariko mu ntara ya Hubei ari nayo irimo akarere ka Wuhan, indiri yayo.

Ibitaro bibiri byamaze kubakwa byihuse ndetse n’ahantu 11 hari hasanzwe hahurirwa n’abantu benshi haba hahinduwemo ibitanda by’abarwayi.

Abantu babarirwa muri za miliyoni mu ntara za Hubei na Zhejiang babwiwe ko umuntu umwe gusa muri buri rugo ari we wemerewe gusohoka muri buri minsi ibiri.


Nyina w’uwo mwana na we yasanganywe coronavirus mbere yo kubyara

Irebere na Video utapfa gusanga ahandi: Uwumva ko azafashwa n’umututo w’imbunda ashyire agapira hasi, hagiye gupfa abantu batanu bakomeye kuri iyi si, n’ibindi byose Barafinda yavuze, ni muri iyi Video:





Tanga igitekerezo kuri iyi nkuru



Igitekerezo