Idamange Iryamugwiza Yvonne ukurikiranyweho ibyaha 6 birimo guteza imvururu muri rubanda, kuri uyu wa Kane nibwo aburanira imbere y’Urukiko rw’Ibanze rwa Gasabo ku ifunga n’ifungurwa by’agateganyo.

Inteko iburanisha igizwe n’umucamanza n’umwanditsi . Urubanza ruri kuba hifashishijwe ikoranabuhanga ,uregwa ari kuri Station ya RIB ya Remera aho afungiye mu gihe urukiko rwo rwari Kibagabaga mu Mujyi wa Kigali.

Mu cyumba cy’iburanisha, harimo abanyamakuru ndetse n’abandi bantu bake bo mu nzego zishinzwe uburenganzira bwa muntu, mu gihe ku rundi ruhande Idamange ari kumwe n’umwunganizi we mu cyumba cya RIB.

Ubushinjacyaha buvuga ko Idamange yakoze ibyaha ko bumukurikiranyeho bitandatu, ari byo:

1. Guteza imvururu cyangwa imidugararo muri rubanda
2. Gutesha agaciro ibimenyetso bya Jenoside yakorewe Abatutsi mu 1994,
3. Gutanga Sheki zitazigamiye
4. Gutangaza amakuru y’ibihuha
5. Gutambamira ishyirwa mu bikorwa ry’imirimo y’igihugu,
6. Gukubita no gukomeretsa

Idamange yahise abwira Urukiko ko ibyaha byose akurikiranyweho n’Ubushinjacyaha atabyemera.

Ubushinjacyaha bwafashe umwanya busobanura icyaha ku kindi uko Idamange yagikoze. Bwavuze ko Idamange yavuze ko Abanyarwanda barambiwe “gufatirwa imyanzuro idahwitse”. Aha ngo yasabye Abanyarwanda guhurira kuri Village Urugwiro (Ibiro bya Perezida) kugira ngo bigaragambye.

Ngo yanasabye Abanyarwanda baba mu Ntara kuza kwigaragambiriza i Kigali ndetse asaba n’abari mu mahanga kwigaragambya.

Bwakomeje buvuga ko Idamange yavuze ko Leta icuruza imibiri y’abishwe muri Jenoside abanyamahanga basura inzibutso.

Ubushinjacyaha buti “Idamange yavuze ko u Rwanda ruyobowe n’umuzimu”.

Umucamanza yahaye ijambo Idamange ngo yisobanure, avuga ko icyamuteye kuvuga ari agahinda yari afite.

Ati “Njye natangiye gutekereza kuvugira abaturage muri Guma mu Rugo ya mbere kandi murabizi ko abaturage bari bashonje.

Idamnage avuga ko yibajije impamvu iyo habayeho ikintu gituma habaho Guma mu Rugo babanza gufunga insengero.

Abamwunganira bo bavuze ko umukiriya wabo yagabweho igitero n’abantu batazwi.

Uyu mugore wavuzwe cyane ku mbuga nkoranyambaga kubera amagambo aremereye yakoreshaga mu biganiro yatangaga kuri Youtube ivugwagaho gupfobya Jenoside yakorewe Abatutsi aho yatawe muri yombi ku ya 15 Gashyantare 2021.

Uyu mugore akurikiranyweho ibyaha bine ari byo guteza imvururu cyangwa imidugararo muri rubanda, icyaha cyo gutangaza amakuru y’ibihuha, icyo konona cyangwa gutesha agaciro urwibutso rwa Jenoside cyangwa ahashyinguye imibiri y’abazize Jenoside ndetse n’icyaha cyo gukubita no gukomeretsa ku bushake yakoze ubwo yaajyaga gufatwa agakubita icupa umupoli mu mutwe.

Ku wa Mbere w’icyumweru gishize, Urwego rw’Igihugu rw’Ubugenzacyaha (RIB) rwari rwashyikirije dosiye ye Ubushinjacyaha kugira ngo bumuregere inkiko.

Idamange yatawe muri yombi amaze gutambutsa ibiganiro bisa nk’ibihabanye n’ukuri ndetse bimwe muri byo yanahamagariye abantu kujya gukora imyigaragambyo ku biro by’Umukuru w’Igihugu.

Benshi baramuneze kubera kuvuga ku mukuru w’Igihugu, nka Ingabire Marie Immaculee wavuze ko nta mukuntu ukwiye gukinisha kuvuga nabi Perezida kuko iyo hari “umuhangaye uba uhangaye Abanyarwanda twese twamutoye.”

Idamange akimara gutabwa muri yombi, bamwe mu banyarwanda baba mu mahanga, biraye mu mihanda ngo basaba ko arekurwa kuko bo bamufata nk’impirimbanyi y’uburenganzira bwa muntu.

---

---