Karasira Aimable uzwiho gutanga ibitekerezo bye mu buryo bwihariye kandi yisanzuye, avuga ko Madamu Ingabire Victoire ari umubyeyi mwiza ngo atabona uko arondora ibigwi bye mu Banyarwanda nubwo ngo hari abagenda bamusebya.

Ibi Karasira yabigarutseho mu kiganiro cyihariye yagiranye n’UMUBAVU wamubazaga uko afata Victoire n’ibyo amuziho by’umwihariko nk’uwitiriwe umunsi mpuzamahanga wo kuzirikana imfungwa za politike n’abafungiwe ibitekerezo byabo wamwitiriwe ’Ingabire Day’ wizihizwa ku wa 14 Ukwakira.

Karasira abajijwe uko afata Victoire, ati "Uriya ni Tantine, ni umubyeyi mwiza cyane ntabona uko ndaondora ibigwi bhye mu Banyarwanda".

Avuga ko ari umuntu wangishijwe n’itangazamakuru rimwangisha abantu kimwe n’abantu ku giti cyabo avuga ariko ngo ni umubyeyi ufite umutima wa kimuntu kandi wa kibyeyi.

Karasira avuga ko Victoire ashaka demokarasi n’ubutegetsi bugendeye ku matora, ngo kandi nubwo atavuga rumwe na Leta, ntiyabaye ikigwari nk’abo avuga ko basigaye hanze birirwa batongana basebya igihugu. we ngo yaraje ari gutanga umusanzu we.

Ashingiye ku munsi mpuzamahanga wo kuzirikana imfungwa za politike n’abafungiwe ibitekerezo byabo, Karasira yagarutse ku bantu batandukanye bagiye baburirwa irengero, abagiye bicwa kimwe n’abagifunze.

Muri aba yagarutse kuri Niyonsenga Dieudonne alias Cyuma Hassan, nyiri Televiziyo ikorera kuri Murandasi yise ’ISHEMA TV’ ufunzwe akurikiranyweho ibyaha bitatu birimo gukoresha inyandiko mpimbano, kwiyitiria urwego rw’umwuga no gusagarira abashinzwe umutekano, ibyaha byose ahakana.

Karasira kandi yakomoje kuri Kizito Mihigo igipolisi cy’u Rwanda mu kwa Kabiri cyatangaje ko yapfuye yiyahuye ntibivugweho rumwe, akavuga ko uyu munsi witiriwe Victoire ’Ingabire Day’ ari uwo kuzirikana abaharanira ukuri bose bikarangira babiguyemo.

Uretse Karasira uvuga byinshi byiza bya Ingabire Victoire, hari undi muturage baziranye umuvuga imyato avuga ko kuva bamenyanye amusokoza muri Salon aho akora, ngo yamugiriye neza nyuma yo kumuha serivisi yari yaje gusaba.

Uyu muturage avuga ko yagerageje kugenzura Victoire ngo yumve ko yamwumvaho ikiganiro kibi ariko ngo mu myaka ibirti bamaranye bakorana nat kibi aramwumvaho.

Icyakora avuga ko ibyo kuvugwa nabi abyumva hanze, akavuga ko iyo abyumvise bimushobera, ati "Nanjye bikambere urujijo gutyo nyine nkavuga nti ’ese hanze bamuvuga nabi’ ariko mu rugo jyewe iyo mpageze mbona nta kibazo".

Akomeza avuga ko n’aho atuye ntawumuvuga nabi ngo uretse ibivugwa gusa ko yafungiwe ibya Politiki, akavuga ko ubusanzwe asabana n’abantu.

Ingabire Victoire, ni umunyapolitiki utavuga rumwe n’ubutegetsi buriho mu Rwanda akanaba umuyobozi w’ishyaka rya DALFA-Umurinzi ritaremerwa n’amategeko mu Rwanda, ishyaka yashinze mu mwaka ushize wa 2019.

BYINSHI BIKOMEYE KARASIRA YAVUZE KURI INGABIRE VICTOIRE KIMWE N’UYU MUTURAGE UMUVUGA IMYATO URABYIYUMVIRA MURI IYI VIDEO:

---

---