Umuti wa Covid-19 uraboneka kuri magendu gusa mu Buhinde

Umuti wa Remdesivir uri kwifashishwa mu kuvura icyorezo cya Covid-19 mu Buhinde ubu uhenze cyane ku isoko rya magendu aho uri kuboneka honyine.

Ariko kuwubona muri iki gihe birakomeye. Bwana Sharma yahamagaye abantu benshi ngo bawumushakire kuko ubuzima bwariho bucika nyirarume.

Ati "Nari mfite amarira mu maso. Marume yariho arwana n’amagara nanjye ndiho nshakisha umuti wamukiza.

"Nyuma yo guhamagara abantu benshi, nishyuye uyu muti igiciro gikubye Karindwi ngo uboneke. Nashoboraga gutanga igisabwa cyose n’ubundi, ariko ndatekereza ku batabasha kuwishyura".

Sharma ni umwe mu bantu benshi ubu bagomba kwishyura igiciro gihanitse ngo babone uyu muti ku isoko ridasobanutse mu murwa mukuru Delhi.


Mu kwezi gushize kwa Gatandatu ubwandu bwa Covid-19 bwariyongereye cyane mu Buhinde

Nyirarume wa Abhinav Sharma yajyanywe mu bitaro i New Delhi afite umuriro mwinshi atanahumeka neza, bamusanzemo coronavirus ndetse basaba Sharma kumushakira remdesivir.

Uyu ni umuti wemejwe mu Buhinde ko ugeragezwa ndetse ko ukoreshwa "aho bikenewe cyane", bivuze ko abaganga bashobora kuwandikira abarwaye.

Mu bantu batandukanye bo ku isoko ry’imiti rizwi nka ’old Delhi’ mu gihugu cy’u Buhinde bagerageje kuvugana n’umunyamakuru wa BBC, bamubwiye ko bawumubonera.

Umwe uvuga ko akora muri business y’imiti ati "Nakubonera uducupa dutatu kamwe ku 30,000 y’amarupi y’u Buhinde [hafi 400,000Frw]".

Igiciro cyemewe cy’uyu muti ubusanzwe ni 5,400 y’amarupi, mu gihe umurwayi akenera hagati y’uducupa dutanu na dutandatu tw’uyu muti.

Undi ’mucuruzi’ wayo yavuze ko yamugurisha agacupa kamwe ku 38,000 y’amarupi.

Uyu muti urashakishwa kuko byabonetse ko ubasha kugabanya igihe ibimenyetso by’iyi ndwara bimara, bikava ku minsi 15 ikaba 11 mu mageragezwa yakozwe mu bitaro bitandukanye ku isi.

Abahanga ariko baburiye abantu ko uyu atari "umuti uvura nyabyo" Covid-19. Ariko mu gihe ntawundi uraboneka wemejwe abaganga bawandikira ku bwinshi abayirwaye mu Buhinde.


Ibitaro byinshi mu Buhinde byagize abarwayi benshi kubera kwiyongera kwa Covid-19

BBC ivuga ko yamenye indi miryango myinshi byabaye ngombwa ko yishyura iki giciro cy’umurengera ngo ibone iyi miti iri kuboneka ku isoko rya magendu gusa.

Impamvu bimeze bitya ni ikinyuranyo kinini kiri hagati y’abawushaka n’uri kuboneka.

Kompanyi yo muri Amerika yitwa Gilead Sciences ubundi yakoze remdesivir ngo ivure Ebola, yemereye kompanyi enye zo mu Buhinde gukora uyu muti muri iki gihugu

Gusa kugeza ubu kompanyi imwe yitwa Hetero niyo iri kuwukora.

Iyi kompanyi imaze gutanga dose 20,000 zawo muri leta eshanu zo mu Buhinde, ariko ivuga ko itazi uburyo wageze ku isoko.

Sandeep Shahstri wungirije umukuru wa Hetero ati "Ntabwo twahaye uyu muti abacuruzi. Nk’uko bisabwa, twawuhaye ibitaro nta handi biciye".

Bwana Sandeep avuga ko bari gukora ibishoboka ngo babone ukenewe wose mu bitaro, ariko ko baciwe intege no "kuba uri gucuruzwa ku masoko ya magendu".

Za Farumasi na zo zivuga ko zidafite uyu muti.


Uyu muti ubundi wakozwe ugenewe kuvura Ebola

Kugeza ubu haribazwa uko uyu muti ugera ku isoko ry’imiti rizwi nka ’old Delhi’.

Rajiv Singhal ukuriye urugaga rw’abacuruza imiti mu Buhinde ahakana ko nta mucuruzi w’imiti wemewe ubifitemo uruhare.

Imiryango ifite abarwayi ba Covid-19 ikaba ikomeje kugorwa no kubona uyu muti ku masoko ya magendu kandi ku giciro gihanitse.

U Buhinde ubu ari igihugu cya gatatu ku isi kimaze kubonekamo abantu benshi banduye coronavirus, abakize muri iki gihugu barenga 400,000 naho abakirwaye barenga 200,000.


Mu Buhinde umuti wa remdesivir ukorwa n’uruganda Hetero rwawuhaye izina rya Covifor

U Bwongereza bwahagurukiye ba ruharwa mu guhonyora uburenganzira bwa muntu batibagiwe no kubica, impunzi z’Abarundi mu kababaro k’iyicwa rya bagenzi bazo, haribazwa niba koko ’IBIFI BININI’ byahagurukiwe n’andi makuru menshi utapfa gusanga ahandi ni k’UMUBAVU TV ONLINE:





Tanga igitekerezo kuri iyi nkuru



Igitekerezo