Umushinga wo guhindura Itegeko Nshinga ukomeje gutera intugunda mu Nteko ya Uganda

Impagarara zirimo no kutumvikana nibyo byaranze Inteko y’Abadepite ya Uganda ku munsi w’ejo, ibintu bikomeje gukoma mu nkokora igikorwa kwiga ku mushinga w’itegeko rigenga imyaka ntarengwa umukandida mu matora y’umukuru w’igihugu agomba kuba afite.

Ku munsi wa kabiri w’Inteko ya Uganda mu gikorwa cyo gukomeza kungurana ibitekerezo ku mushinga w’itegeko rigenga imyaka umukandida ku mwanya w’umukuru w’igihugu agomba kuba yujuje, byongeye gusubikwa nyuma y’aho Abadepite bo ku ruhande rutavuga rumwe na Leta batangarije ko bafite impungenge z’umutekano wabo.

PNG - 733.6 kb
Hacaga uwambaye mu Nteko ya Uganda


Aba badepite ntibemeranya n’iri tegeko rishya bashingiye ko mu gihe ryaramuka ryemewe ryaha uburenganzira Perezida Museveni bwo kongera kwiyamamariza kuyobora igihugu ku nshuro ye ya gatandatu.

Leta ya Uganda itangaza ko hari Abapolisi mu ngoro y’Inteko Nsingamategeko ariko batari abasirikari nk’uko abo badepite batavuga rumwe na Leta babiketse.
Umuyobozi w’Inteko Nsingamategeko ya Uganda, Rebecca Kadaga, yavuze ko yanenze imyifato y’abo badepite batavuga rumwe na Leta, anasaba ko bakorwaho iperereza.

PNG - 631.3 kb
Umuyobozi w’Inteko Nsingamategeko ya Uganda, Rebecca Kadaga


Rebecca Kadaga yongeyeho ko nta kabuza ibiganiro kuri uyu mushinga w’Itegeko rigenga imyaka ntarengwa umukandida mu matora y’umukuru w’igihugu agomba kuba afite bigomba gukomeza.

Abakurikiranira hafi ibya Politiki y’igihugu cya Uganda bo bavuga ko mu gihe iri tegeko ryaba ryemejwe, iyi yaba ibaye inzira nziza Museveni w’imyaka 73 abonye yo kugundira ku butegetsi.

PNG - 846 kb
Museveni wagiye ku butegetsi ku itariki ya 29 Mutarama 1986


Yoweri Kaguta Museveni wavutse tariki ya 15 Nzeli 1944, yagiye ku butegetsi ku itariki ya 29 Mutarama 1986. Mu gihe uyu mushinga w’Itegeko waba wemejwe n’Abadepite, yaba yemerewe kongera kwiyamamariza kuyobora igihugu cya Uganda ku nshuro ye ya 6.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo