Umushahara w’intica ntikize ku bapolisi bato yaba ari yo ntandaro yo kurya ruswa kuri bamwe?

Minisiteri y’Umutekano w’Imbere mu Gihugu yatangaje ko nyuma y’imyaka isaga 20, Polisi y’u Rwanda (RNP) imaze gutera imbere gusa ibibazo by’umushahara wafatwa nk’intica ntikize ku bapolisi bato uracyari ikibazo, ibintu bamwe bavuga ko bishobora kuba intandaro yo kurya ruswa kuri bamwe muri aba bapolisi bato dore ko uru rwego rwaje mu z’imbere mu kurya no kwakira ruswa.

Ibi iyi Minisiteri yabitangarije abadepite bagize Komisiyo y’Ububanyi n’Amahanga n’Umutekano mu nteko ishinga amategeko kuri uyu wa 10 Gashyantare uyu mwaka.

Iyi Minisiteri yatangaje ko inzego nk’ikoranabuhanga ziri mu zatejwe imbere, ingingo yatumye RNP igirirwa icyizere kugeza ubwo itangiye koherezwa mu butumwa bw’Umuryango w’Abibumbye mu bikorwa byo kugarura amahoro hirya no hino ku Isi. Imibare irerekana ko kuva mu 2005 abagera ku bihumbi bitanu bamaze koherezwa mu butumwa bw’amahoro.

N’ubwo bimeze bityo, haracyari ibibazo bitandukanye by’umwihariko ku bapolisi bato. Ibi birashingira ahanini ku mushahara w’intica ntikize. Iyi Minisiteri y’Umutekano nk’uko Radiyo Ijwi rya Amerika ibitangaza, yabwiye abadepite ko umushahara w’umupolisi muto ugera kuri konti ku kwezi uri hagati ya Frw 27,000 na 30,000.

Ibi ngo biba intandaro ya bamwe mu bapolisi batoroka bakajya gushakira imibereho ahandi ndetse bamwe bagafatirwa mu byaha bya ruswa.

Ushinzwe imari muri RNP, CP Vincent Sano ati "Ikibazo cya Desertion [gutoroka akazi], abapolisi hagati ya 400 na 500 baratoroka. Iyo dukoze ubushakashatsi ku gituma batoroka, akenshi batubwira ko ari imibereho, babihuza n’imishahara bahembwa. Umupolisi muto ahembwa take home [ayo ajyana mu rugo] ibihumbi hagati ya 27000 na 30,000. Ugereranyije n’imibereho yo hanze, iyo abonye aho ajya gutwara imodoka kuko ubusanzwe umushoferi muri Leta ahembwa Frw 120,000. Dufite rero iyo challenge [imbogamizi]."

Kubera imibereho mibi, imibare itangwa na polisi ivuga ko abapolisi bato hagati ya 80-100 birukanwa buri mwaka kubera ibibazo bya ruswa.

Ibi bihurirana n’uko Umuryango Mpuzamahanga Urwanya Ruswa n’Akarengane Ishami ry’u Rwanda (TI-Rwanda), ukunze gushyira Polisi mu b’imbere mu kurya ruswa uko umwaka utashye.

Umuyobozi wa Polisi y’u Rwanda, CGP Dan Munyuza avuga ko umushahara w’intica ntikize ku bapolisi bato ari intandaro yo gutoroka akazi gusa akavuga ko harimo n’ikibazo cy’imyumvire.

Ati "Ni amafaranga makeya ariko ibi nabyo bigenda biba adressed [bikemurwa] uko umutungo w’igihugu ugenda wiyongera. Ikibazo cy’umushahara kirahari ariko hari n’icy’imyumvire. Aba batoroka, iyo dukoze research [ubushakashatsi] usanga ubuzima babayeho hanze, 90% usanga bifuza kugaruka ariko biri too late [warakererewe]. Iyo wirukanwe uba wirukanwe. Ni imyumvire iri hasi, iyo uri muri Polisi, barakwambika, bakagucumbikira, iragutunga (...)."

Iyi Minisiteri kandi yatangaje ko umubare w’abapolisi ukiri muto. Mu Rwanda habarurwa abapolisi 16, 000 na Sitasiyo za Polisi 215.

Birasabwa ko buri mwaka hinjizwa abapolisi ibihumbi bitatu ku mwaka, gusa ngo amikoro atuma hinjizwa 1500 gusa. Harasabwa kandi amikoro ngo hanozwe ahafungirwa abakekwaho ibyaha. Ni ibikorwa ngo byatwara asaga Frw miliyari.

Komisiyo y’Ububanyi n’Amahanga n’Umutekano mu Nteko Ishinga Amategeko umutwe w’Abadepite yavuze ko igiye gukora ubuvugizi.

Uyiyobora, Fidele Rwigamba ati "Kubera ko budjet [ingengo y’imari] itorerwa iwacu, turabizi ko Guverinoma yose izi izi challenge [ingorane]. Turabibona, tuzakora ubuvugizi, ka bije [budjet] kajye kazamurwa amikoro y’igihugu ni makeya. Ni ibintu bigenda biza buhoro buhoro.

Kuri ubu abapolisi b’u Rwanda bacumbikirwa ni ibihumbi bitandatu gusa. Umupolisi umwe arindira abaturage 782 mu gihe ku rwego mpuzamahanga umupolisi abarirwa abaturage 420.

Irebere na Video utapfa gusanga ahandi:





Tanga igitekerezo kuri iyi nkuru



Igitekerezo