Umusenateri wo mu ishyaka rimwe na Perezida Kenyatta arashimangira ko nta kosa Odinga yakoze arahira

Umunyapolitiki Irungu Kang’ata ukomoka mu Karere ka Murang’a akaba n’umusenateri ukomoka mu ishyaka rya Jubilee riri ku butegetsi mu gihugu cya Kenya ari naryo Perezida Uhuru Kenyatta akomokamo, yatangaje ko kuba Raila Odinga yararahiriye kuyobora Kenya nta kosa abibonamo ngo kuko iyo habamo amakosa aba yarafashwe maze akayaryuzwa.

Umuyobozi w’Impuzamashyaka atavuga rumwe na Leta iriho muri Kenya (National Super Alliance, NASA), Raila Odinga yarahiye kuba Perezida wa Kenya ku wa kabiri tariki ya 30 Mutarama 2018 nkuko yari yarabitangarije abarwanashaka dore ko nabo batahwemaga kubimusaba bavuga ko nta Perezida bafite.

Irungu Kang’ata yakomeje avuga ko uretse ibyo kurahirira kuyobora igihugu, Raila Odinga nta magambo mabi yavuze nk’ayo bamwe mu bo bafatanyije kuyobora ishyaka batangaje bamwe bikanabaviramo gutabwa muri yombi.

Ubwo yaganiraga n’ikinyamakuru Tuko, uyu musenateri yavuze ko nta mategeko Raila Odinga yishe kuko ngo iyo ayica aba yaratawe muri yombi maze akaryuzwa ibyo yakoze.

Kimwe n’ikinyamakuru Standard nacyo cyanditse iyi nkuru, kivuga ko Raila Odinga nta makosa yakoze yewe nta n’amategeko yishe gishingiye ko mu gihe yaba yarakoze ibyo atakagombye kuba akidegembya kandi amategeko ahari.

PNG - 754.2 kb
Uyu ni Senateri Kang’ata ukomoka mu Karere ka Murang’a


Mu magambo ye yagize ati “ Raila Odinga nta kosa na rimwe yakoze. Iyo aza kuba yarishe amategeko aba yaratawe muri yombi. Gusa mu gihugu habamo Abaperezida benshi b’ibigo bitandukanye nk’ab’abanyeshuri muri za Kaminuza bityo ntawamenya Odinga ari Perezida w’ikihe kigo”.

Yakomeje avuga ko bamwe mu bafatanyije na Odinga kuyobora ishyaka batawe muri yombi batazize irahira rya Odinga ko ahubwo bazize amagambo mabi abiba urwango mu baturage batangaje.

Yagize ati “gufatwa kwa bamwe mu bayobozi ba NASA ni ukubera amagambo mabi abiba urwango bavuze”.

PNG - 517.2 kb
Odinga yarahiriye kuyobora Kenya ku wa 30 Mutarama 2018


Irahira rya Odinga ryasize Abadepite barimo T.J Kajwang, George Aladwa na Miguna Miguna batawe muri yombi n’igipolisi bazira amwe mu magambo bagiye batangaza abiba urwango mu baturage ba Kenya ndetse no kugaragara muri bimwe mu bikorwa bishobora guteza impagarara mu gihugu. Gusa bamwe muri aba bagiye batabwa muri yobmi n’igipolisi bagiye barekurwa nyuma bamwe batanze ingwate y’amafaramga.

Umuhango w’irahira rya Odinga wabaye mu gihe Perezida Uhuru Kenyatta yari yibereye mu nama y’abakuru b’ ibihugu I Addis Abeba mu gihugu cya Ethiopia.

Odinga yarahiye kandi mu gihe mu Gushyingo umwaka ushize, Uhuru Kenyatta yarahiriye kuyobora Kenya, ni umuhango witabiriwe n’abakuru b’ibihugu barenga 10, barimo na Perezida w’u Rwanda Paul Kagame.

Kenyatta yagiye kuri uyu mwanya nyuma yo gutsinda amatora yasubiwemo tariki ya 26 Ukwakira aho yagize amajwi arenga 98%.

Mu matora yari yabanje, Komisiyo y’amatora yari yemeje ko Uhuru Kenyatta yatsinze Raila Odinga ku majwi 54,27%, mu gihe Odinga yari yagize 44,74%.

Gusa Odinga yanze iki cyemezo, avuga ko habayeho kwiba amajwi, ahita anatanga ikirego mu Rukiko.

Nyuma yo gusubirishamo amatora, Odinga yanze kuyitabira ahubwo avuga ko ari we mukuru w’igihugu.

Irahira rya Odinga kandi ryasize bimwe mu bitangazamakuru bikomeye mu gihugu cya Kenya nka NTV na Citizen TV & Radio bifunzwe amakuru akavuga ko byaba byarazize ko byashakaga kwerekana umuhango w’irahira rya Raila Odinga.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo