Coronavirus muri Algeria, i Burayi iravuza ubuhuha

Minisitiri w’Ubuzima wa Algeria yemeje ko umuntu wa mbere bamusanzemo ubu bwoko bushya bwa Coronavirus, mu itangazo yasomeye kuri Televiziyo y’igihugu ENTV ejo ku wa Kabiri tariki ya 25 Gashyantare 2020 nimugoroba.

Minisitiri Abdel Rahman Ben Bouzid yavuze ko uwo murwayi ari umugabo wo mu Butaliyani wageze muri Algeria ku itariki ya 17 y’uku kwezi kwa Kabiri, nkuko bitangazwa n’Ibiro Ntaramakuru Reuters.

Ubu tuvugana uwo murwayi yashyizwe mu kato.

Perezida Abdelmadjid Tebboune wa Algeria nyuma yaje gutangaza kuri Twitter ko yatagetse abakuriye urwego rw’ubuvuzi mu gihugu kwigengesera ku rwego rwo hejuru rushoboka, nkuko Reuters ibitangaza.

Yanasabye abaturage ba Algeria kwitondera amakuru batangaza ku mbuga za Internet.

Amajyaruguru y’u Butaliyani, atuwe n’Abanya-Algeria benshi, akomeje kuba izingiro rya Coronavirus muri icyo gihugu. Kompanyi Eni y’iby’ingufu y’i Milan mu Butaliyani inafite imishinga muri Algeria.

Algeria ibaye igihugu cya Kabiri ku mugabane wa Afurika cyemeje ko hari umuntu basanzemo Coronavirus.

Misiri ni yo yabaye igihugu cya mbere muri Afurika muri uku kwezi cyemeje ko hari umuntu cyasanzemo Coronavirus, ariko nyuma kiza gutangaza ko uwo mugabo atakiyirwaye ndetse arimo gukira.

Coronavirus yakamejeje i Burayi

Mu yandi makuru, ibihugu byinshi by’i Burayi byatangaje abantu ba mbere basanzwemo Coronavirus, benshi bakaba bafitanye isano n’u Butaliyani aho ikomeje kwiyongera.

Austria (cyangwa Autriche), Croatia n’u Busuwisi byatangaje ko abantu basanzwemo Coronavirus bari baragiye mu Butaliyani.

Mu minsi micye ishize, u Butaliyani bwahindutse igihugu cyugarijwe na Coronavirus cyane i Burayi, mu Butaliyani hakaba hari abarwayi barenga 300 naho abantu 11 ikaba imaze kubica.

Ariko nubwo bimeze gutyo, ibihugu bituranye n’u Butaliyani byavuze ko gufunga imipaka bihana nabwo "byaba birimo gukabya".

Umuntu wa mbere wasanganywe Coronavirus yanagaragaye kandi muri Amerika y’Epfo, mu gihugu cya Brazil. Uwo akaba ari umuturage wo muri Brazil wasubiye iwabo avuye mu Butaliyani.


Perezida wa Algeria, Abdelmadjid Tebboune yasabye abaturage kwitondera amakuru batangaza ku mbuga za Internet ajyanye na Coronavirus

Byari amarira n’agahinda gusa mu gusezera kuri Kizito Mihigo mu rugo rw’umubyeyi we, Diane Rwigara yararuciye ararumira amaze kumusezeraho:





Tanga igitekerezo kuri iyi nkuru



Igitekerezo