Umunyeshuri yishe bagenzi be 2 abarashe na we arirasa

Abanyeshuri babiri bafite imyaka 16 na 14 bishwe naho abandi batatu barakomereka ubwo umusore witwaje imbunda yarasaga ku ishuri ryisumbuye ry’i California, nkuko abategetsi babivuga.

Abo bapfuye biciwe muri icyo gitero cyamaze amasegonda 16, mbere gato yuko amasomo atangira ejo ku wa Kane, ku ishuri ryisumbuye rya Saugus High School riri mu Majyaruguru ya Los Angeles.

Icyo gitero cyabaye ku isabukuru y’imyaka 16 y’amavuko y’ucyekwaho kukigaba, watangajwe n’ibitangazamakuru byo muri Amerika ko ari umunyeshuri mugenzi wabo witwa Nathaniel Berhow.

Uwo ucyekwa yahise yirasa mu mutwe, ubu ubuzima bwe bukaba buri mu kaga.

Abanyeshuri n’abarimu bavuze ukuntu bihishe mu mashuri, bakurikiza amabwiriza yuko bitwara mu gihe hari umuntu uri kurasa.

Aya ni amabwiriza bahawe mu myaka ya vuba ishize ubwo habaga ibitero ku mashuri atandukanye mu gihugu.

Amakuru ajyanye n’icyo gitero yatangajwe bwa mbere saa moya n’iminota 38 za mu gitondo ku isaha yo muri ako gace ejo ku wa Kane, nkuko bivugwa na Alex Villanueva, umutegetsi wo muri ako Karere.

Yongeyeho ko abapolisi bahageze hashize iminota ibiri.

Uwo ucyekwa yari ahagaze mu kibuga cy’ishuri ubwo yakuraga mu gikapu cye cyo mu mugongo imbunda ye nto yo mu bwoko bwa pisitoli ya 45-calibre, inyuzamo ikohereza amasasu icyarimwe.


Polisi ngo yahageze mu gihe gito gishoboka

Nuko arasa mu gihe cy’amasegonda 16 mbere yuko yitunga imbunda ku mutwe, nkuko bivugwa n’umukuru ushinzwe umutekano muri ako karere, Kapiteni Kent Wegener.

Kapiteni Wegener yagize ati "Yarashe gusa, arasira aho ahagaze. Atirukankana umuntu n’umwe. Atava aho ari".

Abanyeshuri bakomeje kwihisha mu mashuri mu gihe kirenze isaha imwe ubwo polisi yageragezaga kumenya niba uwo warashe akidegembya.

Abapolisi babonye abantu batandatu bafite ibikomere batewe n’amasasu, bajyanwa ku bitaro biri hafi. Nyuma ucyekwa yaje gutahurwa ko ari umwe muri abo bakomeretse.


Kuri iryo shuri, cyo kimwe n’andi mashuri ahegereye, umutekano wakajijwe





Tanga igitekerezo kuri iyi nkuru



Igitekerezo