Umunyamakuru Phocas Ndayizera na bagenzi be basabiwe gufungwa burundu

Abashinjacyaha basabiye umunyamakuru wigenga Phocas Ndayizera na bagenzi be 13 bareganwa ibyaha by’iterabwoba igifungo cya burundu.

Baregwa ibyaha byo gucura umugambi mu gukora iterabwoba bakoresheje ibintu biturika, ku bikorwaremezo binyuranye mu Mujyi wa Kigali.

Mu maburanisha aheruka humviswe abaregwa, bose bireguye bahakana ibyaha baregwa, uyu munsi ubushinjacyaha nibwo bwahawe umwanya ngo buvuge ku bwiregure bwabo.

Mu rukiko ruburanisha ibyaha nk’ibyo ruri i Nyanza mu majyepfo, abashinjacyaha bagarutse ku majwi bavuga ko yafashwe bamwe mu baregwa, nka kimwe mu bimenyetso simusiga bavuga ko gihamya umugambi bari bafite wo guhungabanya umutekano.

Ayo majwi yumvikanamo Cassien Ntamuhanga, uyu yacitse gereza mu 2017 ufatwa nk’uwateguraga uwo mugambi, avugana na Nsengimana Jean Claude wahimbwaga Tembo, uri mu baregwa ubu.

Muri aya majwi, Ntamuhanga yumvikana asaba ’Tembo’ kumushakira intambi zikunze gukoreshwa n’abasatura imisozi no mu bucukuzi bw’amabuye y’agaciro.

Urukiko rwabajije igihamya ko ayo majwi ari aya Ntamuhanga.

Abashinjacyaha bavuga ko hari abahamya ko yafashwe bahari, kandi hashobora gukoreshwa ikoranabuhanga mu gutahura ijwi ry’umuntu.

Kuri Phocas Ndayizera, abashinjacyaha bahakanye ibyo yavuze ko yahatiwe ndetse agapfukwa igitambaro mu maso kugira ngo asinye inyandiko yemera ibyaha, bavuga ko bidashoboka.

Abashinjacyaha basabiye abaregwa bose gufungwa burundu.

Abunganira abaregwa basbaye umwanya wo kuvugana n’abo bunganira ku gihano basabiwe n’abashinjacyaha.

Urukiko rwavuze ko bazahabwa umwanya ku itariki 14 na 15 z’ukwezi gutaha kwa cumi ubwo uru rubanza ruzahita rupfundikirwa.


Mu rukiko i Nyanza, Phocas Ndayizera (ubanza imbere iburyo) areganwa n’abandi 13 gutegura iterabwoba

Hakorwe iki ngo tugere ku mibereho myiza y’Abanyarwanda, iyumvire ikiganiro kirambuye UMUBAVU TV ONLINE wagiranye na Madamu Victoire Ingabire Umuhoza, umuyobozi w’ishyaka ritavuga rumwe n’ubutegetsi rya DALFA Umurinzi ariko ritaremerwa n’amategeko mu Rwanda:





Tanga igitekerezo kuri iyi nkuru



Igitekerezo