Umuntu wa mbere yishwe na Covid-19 muri Vietnam

Igitangazamakuru cya leta ya Vietnam cyatangaje ko uwo muntu wa mbere wishwe na Covid-19 ari umugabo w’imyaka 70 wo mu mujyi wa Hoi An uri hagati mu gihugu.

Hari hashize amezi arenga atatu nta bwandu bushya bwa Coronavirus butangazwa muri Vietnam, kugeza mu ntangiriro z’iki cyumweru ubwo hari abanduye babonetse mu mujyi wa Da Nang.

Vietnam, igihugu cyo muri Aziya y’Epfo gituwe n’abaturage barenga miliyoni 95, hatangajwe abantu barenga gato 500 gusa banduye iki cyorezo kuva cyahagera.

Kuva hagati mu kwezi kwa Kane nta bwandu bushya bwagaragaye imbere mu gihugu.

Minisitiri w’Intebe w’iki gihugu Nguyen Xuan Phuc ku wa Gatatu yaburiye ko buri ntara yose mu gihugu ubu yugarijwe no kuba yabona ubwandu bushya nyuma y’uko hari ububonetse muri Da Nang.

Yavuze ko leta igiye kongera imbaraga mu kurwanya iki cyorezo nk’uko bivugwa n’igitangazamakuru cya leta.

Leta yaho yabanje guhagarika ubukerarugendo muri Da Nang, mbere y’uko ku wa Gatatu bategeka ko abatuye uyu mujyi baguma mu ngo zabo (lockdown).

Bitandukanye n’ibindi bihugu byinshi, Vietnam yafashe ingamba itaragira umuntu wanduye iki cyorezo, ifunga imipaka ku bagenzi hafi ya bose, uretse abanyagihugu bagaruka iwabo.

Buri wese winjiraga muri iki gihugu leta yamushyiraga mu kato k’iminsi 14 ahateguwe na leta, akanapimwa.

Umuntu wa mbere wabonyweho iyi ndwara muri iki gihugu ntabwo yari aherutse kugisohokamo.

BBC ivuga ko bitazwi neza uburyo iyi virusi yongeye kuboneka muri Da Nang.

Umupilote ukomoka muri Scotland/Ecosse wamaze amezi abiri ari ku cyuma gifasha guhumeka (Ventilator), yamenyekanye cyane muri iki gihugu nk’umuntu urembye kurusha abandi, mbere y’uko asubira mu gihugu cye hagati muri uku kwezi kwa Karindwi.


Vietnam yamaze amezi atatu nta bwandu bwa COVID-19 buraboneka mu gihugu

Umunyamakuru Rutembesa wakoreye UMUBAVU byakekwaga ko yaburiwe irengero yongeye kuboneka ahishura byinshi byamubayeho birimo no kuzira ko yandikiye inkuru UMUBAVU, Karasira nyuma yuko yandikiwe ibaruwa iganisha ku kwirukanwa byahinduye isura, n’andi makuru menshi utapfa gusanga ahandi ni k’UMUBAVU TV ONLINE:





Tanga igitekerezo kuri iyi nkuru



Igitekerezo