Umuntu utazwi yiyitiriye Ingabire Victoire kuri Twitter avuga ko asheshe ishyaka rye

Umuntu utazwi yiyitiriye Madamu Ingabire Victoire kuri Twitter abwira abantu ko asheshe ishyaka rye, uyu Ingabire Victoire akaba asanzwe ari umunyapolitiki utavuga rumwe n’ubutegetsi buriho mu Rwanda unakuriye ishyaka rya DALFA-Umurinzi (Development and Liberty For All) yashinze mu mpera za 2019 kugeza ubu ritaremerwa n’amategeko mu Rwanda.

Uyu wiyitiriye Ingabire Victoire yanditse amagambo agira ati "Ndimo kwitegura gusaba imbabazi Abanyarwanda,ariko mbere na mbere,Njyewe @VictoireUmuhoza
mpagaritse inkunga zose z’amahanga n’abagambanyi banshoraga mu rwobo bo bibereye i Musozi.Ndatangaza kdi ko nsheshe ishyaka ryanjye #Dalfa ku mugaragaro".

"Ubu ngiye gusaba imbabazi mu kimbo cya mama umbyara, umuryango yahekuye muri jenoside yakorewe abatutsi.nihagira ikidasanzwe kimbaho ndababwira".

Uyu yakomeje ati "Abo kwa #Rwigara bibwiraga ko nzakomeza kuba imbata y’amacakubiri. Uyu mwaka wa 2021, nibave muri ibyo baze dufatanye n’abandi kubaka ubumwe. Niko nkangurira na Me Ntaganda kuva muri ako kajagari. Umwaka Mushya Muhire ku Banyarwanda bose!".

Icya Mbere kigaragaza ko uyu atari Ingabire Victoire nyirizina ni uko uyu munyapolitiki nyirizina ubusanzwe kuri Twitter ye afite abamukurikira ibihumbi 14 mu gihe uyu wamwiyitiriye afite gusa abamukurikira 92 (bashobora kwiyongera ariko dukora iyi nkuru bari 92).

Icya Kabiri kigaragaza ko uyu muntu utazwi yiyitiriye Ingabire Victoire, ni uko kuri Twitter ye y’umwimerere handitse "@VictoireUmuhoza" mu gihe ku wamwiyitiriye handitse @VictoirUmuhoza, ni ukuvuga ko ku wamwiyitiriye haburamo inyajwi ’e’ ku izina Victoire.

Ikindi ni uko Ingabire Victoire yatangiye gukoresha Twitter muri Mutarama 2010 mu gihe uyu wamyiyitiriye konti ye ari iyafunguwe mu kwezi k’Ukuboza umwaka dusoje wa 2020 ndetse n’umubare w’abo bakurikira ukaba utandukanye kure.

Ingabire Victoire akimenya ko hari umuntu uri kumwiyitirira kuri Twitter, yifashishije Twitter ye nyirizina yabeshyuje aya makuru abwira abamukurikira ko iyo konti atari iy’ukuri ndetse ntaho ahuriye na yo.

Tugenekereje mu Kinyarwanda ubutumwa bwe yanditse mu rurimi rw’Icyongereza yagize ati "Nshuti mwese, konti @VictoirUmuhoza, si iy’ukuri nta n’aho ihuriye na Victoire Ingabire. Menya ko ifite "e" yabuze mu myandikire. Yafunguwe mu 2020, mu gihe twatangiye gukoreshwa Twitter muri 2010. Ifite abayikurikira 246, dufite 14K. Ntugwe mu mutego wabo!".

Victoire yakunze kumvikana mu bihe bitandukanye yibaza uburyo hari abantu bamwibasira ku mbuga nkoranyambaga bikareberwa aho kugira ngo ababikoze bakurikiranwe ndetse babiryozwe.

Si abantu gusa ku giti cyabo bakunze kumwibasira kuko yakunze no gutunga agatoki ibitangazamakuru byitwa ko bikomeye mu Rwanda bimwibasira bishaka no gucisha abantu imitwe.

Nko mu kiganiro yagiranye n’UMUBAVU muri Kanama 2020, Ingabire Victoire yagarutse ku binyamakuru byitwa ko bikomeye bikunze kwandika inkuru zicisha imitwe abandi, ati "Ubundi ibyo binyamakuru birantangaza, urabona ibinyamakuru bijya ku gasozi bikavuga ngo ’uriya muntu bamuce umutwe, icyo kinyamakuru hari amategeko dufite...".

Yavuze ko ko Urwego rw’Igihugu rushinzwe ubugenzacyaha, RIB rutagategereje ko umuntu ajya kurega, ati "Ubundi RIB ntabwo yakagombye gutegereza ko umuntu ajya kurega, yo ubwayo mu nshingano zayo bagomba gukurikirana ibyaha bakavuga ngo kiriya kinyamakuru cyarenze ku itegeko...".

"Ariko dufite ibinyamakuru hano n’abanyamakuru bafite uburenganzira busesuye byo gukora nka ’Kangura’ nkuko Prof Karasira yabivuze, biratangaje kandi birababaje!".

Victoire yibajije niba ngo amateka ntacyo yigishije, ati "Amateka ntacyo yatwigishije, iyo usubiye inyuma ukareba ntacyo Kangura yakoze muri iki gihugu cyacu, kubiba urwango ntitwabonye aho byagejeje igihugu cyacu?".

Yibajije kandi niba ngo ubu hakenewe abantu birirwa ku mbuga nkoranyambaga bacamo amacakubiri mu Banyarwanda, bose ngo abishyira ku buyobozi bubirebera, ati "Ariko jyewe reka nkubwire, ubuyobozi nibwo nshyiraho icyo kibazo kuko niba abo bantu bahari, hakaba hari amategeko ubuyobozi ntibugire icyo bubikoraho, aho niho ikibazo kiri".

Icyo gihe yagarutse no kubirirwa bamutuka ku mbuga nkoranyambaga bikareberwa nkuko twabigarutseho, akavuga ko aribwo burere bahabwa kuko ntawuhanwa.

Ibi yabigarutseho muri iki kiganiro:

Ingabire Victoire yageze mu Rwanda muri 2010 avuga ko aje kwandikisha ishyaka rye FDU Inkingi ariko ahita atabwa muri yombi ashinjwa ibirimo ingengabitekeezo ya Jenoside.

Nyuma yagejejwe no mu butabera araburanishwa, urukiko rumuhamya ibyaha ndetse rumukatira gufungwa imyaka umunani (8) ariko ntiyanyurwa n’icyemezo arajurira, urwo yajuririye muri 2013 rumukatira gufungwa imyaka 15.

Amaze imyaka abiri arekuwe, kuko muri Kanama 2018 ari bwo yasohotse muri Gereza ku bw’imbabazi za Perezida wa Repubulika.

Mu kiganiro yagiranye n’UMUBAVU muri Kanama 2020, uyu munyapolitiki yagarutse ku buryo yakatiwe gufungwa, avuga ko Urukiko rw’Afurika ngo rwafashe umwanzuro ko ibyo yakorewe afungwa bitari bikwiriye ndetse ngo rwanzura ko agomba guhabwa miliyoni 65 z’Amande.

YABIVUZE MURI IKI KIGANIRO YAGIRANYE N’UMUBAVU:

Yavuze ko iki cyemezo cyafashwe mu kwezi kwa cumi na kumwe kwa 2018 kandi gitegeka ko iyi amande itangwa mu gihe kitarenze amezi atandatu ubu yamaze kurenga icyakora yavuze ko yizeye ko Leta y’u Rwanda itambura izayamuha.

Madamu Ingabire Victoire, ni umunyapolitiki wo ku ruhande rutavuga rumwe n’ubutegetsi mu Rwanda ukunze kumvikana mu gutanga ibitekerezo bye by’umwihariko anenga ibyo abona bitagenda neza ariko anatanga inama z’uko abona byakorwa bikarushaho kunogera abenegihugu.

UMVA MURI IYI VIDEO IJAMBO RISOZA UMWAKA WA 2020 RITANGIRA UWA 2021 INGABIRE VICTOIRE YAGEJEJE KU BANYARWANDA:





Tanga igitekerezo kuri iyi nkuru



Igitekerezo