Umugore uri mu bari kuvurwa COVID-19 yibarutse umuhungu

Ikigo cy’Igihugu cy’ubuzima (RBC), cyatangaje ko umwe mu bari kuvurirwa Coronavirus mu Kigo Nderabuzima cya Rugerero mu Karere ka Rubavu, yahabyariye umwana w’umuhungu kandi bose bameze neza.

Uyu mubyeyi yabyaye kuri uyu wa Gatanu tariki 17 Nyakanga 2020, muri iki Kigo Nderabuzima cya Rugerero kimwe mu bigo bivurirwaho abarwaye COVID-19 mu Rwanda.

Umuyobozi w’Ibitaro bya Gisenyi, Lt Col Dr Kanyankore William, avuga ko n’ubwo bitaramenyekana niba urwo ruhinja rwavukanye ubwandu bwa coronavirus, ngo bazakomeza kurwitaho bakurikirana ubuzima bwarwo no mu gihe nyina yaba akize COVID19, agasubira mu muryango we.

RBC yatangaje ku rukuta rwa Twitter ko “Umwana na nyina bameze neza”.

Mu kwezi gushize nibwo Ikigo Nderabuzima cya Rugerero cyari cyaragenewe kwakira abarwayi ba Ebola igihe hagira uboneka, cyahawe ubushobozi gitangira gutanga serivisi kuri Coronavirus.

Hashyizwe laboratwari irimo imashini zagenewe gupima Coronavirus n’ibindi bikoresho nkenerwa.

Ni ubwa mbere mu Rwanda umugore uri kuvurwa Coronavirus abyariye aho arimo kuvurirwa ariko mu bindi bihugu byakunze kubaho kenshi. Urugero ni umugore wo mu murwa mukuru wa Cameroun i Yaoundé wabyaye umwana w’umukobwa muri Mata uyu mwaka.

Uwo mubyeyi wo muri Cameroon witwa Mariya w’imyaka 19 y’amavuko, na we yabyaye mu buryo busanzwe nta kibazo agize. Gusa nyuma yahise atandukanywa n’umwana we w’uruhinja.

Kugeza ubu mu Rwanda hamaze gufatwa ibipimo bya Coronavirus 20,358 muri rusange. Abamaze gusangwamo icyo cyorezo ni 1,473 naho abamaze kugikira ni 770, bivuze ko abakirwaye ari 699. Ku butaka bw’u Rwanda COVID-19 imaze guhitana ubuzima bw’abantu bane.

Ku Isi yose umubare w’abamaze kugaragaraho iki cyorezo cya COVID-19 ni 13,833,957, kikaba kimaze guhitana 590,650 naho abagikize bakaba ari 7 738 819.

RIB yagaruye Barafinda mu rugo iwe, ijambo rya mbere yavuze akigera mu rugo, umugore we ibyishimo byamusabye:





Tanga igitekerezo kuri iyi nkuru



Igitekerezo