Umugore avuga ko kwandura COVID-19 ‘byakijije ubuzima bwe’

Umugore avuga ko kwandura Coronavirus byarangiye bikijije ubuzima bwe nyuma y’uko abaganga basanze afite indi ndwara ikomeye atari azi.

Angela Schlegel wo mu Bwongereza, yajyanywe mu bitaro hashize iminsi 11 afite ibimenyetso bya Coronavirus, basanga yarayanduye.

Kwa muganga basanze afite ikindi kibazo ku mutima ubwo yari ageze mu cyumba cy’indembe mu bitaro bya Royal Brompton i Londres.

Uyu mugore w’imyaka 36 yagize ati "Nahise numva birangiye ubwo bambwiraga ko umutima wanjye ukora mu buryo utari ukwiye kuba ukora".

Tariki 22 z’ukwezi kwa Gatatu, bamujyanye ku bitaro bimwe aho babonye amazi akikije ibihaha n’umutima we.

Bamwohereje kuri ibi bitaro bya Royal Brompton aho bamusanzemo indwara yitwa eosinophilic granulomatosis, uburwayi bwangiza ibice by’umubiri nk’umutima, ibihaha, ingingo n’imitsi.

Angela avuga ko mu myaka ibiri ishize yahoraga ajya kwivuza asthma ariko "atari azi ko umutima we uri mu kaga".

Ati: "Iyo iyi ndwara itaboneka nari kuzagira gutya bakantwara napfuye.

"Coronavirus yashyize igitutu ku mubiri n’umutima wanjye bituma iyi ndwara izamuka abaganga barayibona.

"Coronavirus yakijije ubuzima bwanjye mu gihe kirambye, nubwo mu kanya gato yari inyishe".


Angela avuga ko kugera mu cyumba cy’indembe byari ibintu biteye ubwoba cyane

Angela wamaze ibyumweru bitanu mu bitaro, avuga ko abaganga bamwitayeho ari ’ntagereranywa’.

Umwe muri aba baganga Dr Pugan Patel yabwiye abanyamakuru ko kubona Angela akira byongereye imbaraga abaganga b’ibi bitaro.

Ati "Iyo ubonye umurwayi ahaguruka akagenda ku maguru ye yombi kandi aseka bigutera ibyishimo".


Angela Schlegel avuga ko kumara ibyumweru bitanu mu bitaro nta muntu umusura byari ibintu bikomeye cyane





Tanga igitekerezo kuri iyi nkuru



Igitekerezo