Umugabo utunze abagore 120 bose bumvikana akomeje gutangaza abantu

Ku myaka ye 58 y’amavuko umugabo witwa Tambon Prasert usanzwe ari umuyobozi w’Akarere ka Phromnee mu gihugu cya Thailand yatangaje abantu nyuma yo gutangaza ko atunze abagore 120 bose bakagira abana 28 kandi igitangaje kurushaho akaba ari uko bose babanye neza nta ntonganya nkuko yabitangarije itangazamakuru.

Uyu mugabo yatangaje ko yarongoye umugore we wa mbere ubwo yari akiri ingimbi y’imyaka 17 babyarana abana 3.

Amakuru y’uyu mugabo yatangiye afatwa nk’ibihuha byatumye bamwe mu banyamakuru basura Akarere ka Phromnee bihurira imbonankubone n’uyu mugabo ababwira ko ari impamo ko ndetse nubwo aba bagore abatunze mu buryo butemewe n’amategeko, babanye neza ntawe usagararira mugenzi we.

Prasert yabwiye abanyamakuru ko umugore we wa mbere yari muto kuri we kuko yamurushaga imyaka 2 ndetse abagore be bose yabashatse bari munsi y’imyaka 20 kuko atakundaga abagore bakuze.

Yagize ati “Nshaka umugore bwa mbere nari mfite imyaka 17, umugore wa mbere wanjye namurushaga imyaka ibiri maze tubyarana abana batatu. Nyuma yahoo nibwo nakomeje kubarunda ndongora abandi. Abenshi muri bo bari bakiri bato ndetse bari munsi y’imyaka 20 kuko sinkunda abagore bakuze".

PNG - 887.5 kb
Uyu ni Tambon Prasert wari hagati y’abanyamakuru ari kubasobanurira iby’ako gahigo yaciye ko gutunga abagore 120 bose


Uyu mugabo usanzwe ari n’umufundi yagiye yubaka inzu muri buri gace yagezemo agahita anahashinga icumu (ahashaka umugore) akayibamo byatumye ageza kuri uyu mubare aho yabwiye abanyamakuru ko akunda abagore be bose kandi nabo bamukunda.

Yagize ati “Ndi umwubatsi wabigize umwuga, bityo aho nageraga ndi kubaka nahasigaga umugore nicyo cyatumye ngeza kuri uyu mubare wose kandi bose barankunda nanjye nkabakunda”.

Yasoje ikiganiro n’abanyamakuru ababwira ko we ari umukire ndetse nta mugore bagiranye ikibazo kuko iyo yajyaga gushaka umugore mushya yabwiraga abagore be bose ikindi kandi ngo abagore 28 batuye hafi y’aho akorera mu mujyi abandi bari mu duce dutandukanye twa Tailand.

PNG - 873.2 kb
Aha Tambon Prasert yari kumwe n’umunyamakuru

Daniel MUKESHIMANA@Umubavu.com





Tanga igitekerezo kuri iyi nkuru



Igitekerezo