Umugabo ashinjwa kunywera Moto akivugana umwana we asibanganya ibimenyetso

Umugabo w’imyaka 60 y’amavuko ukomoka mu Karere ka Kyotera mu gihugu cy’abaturanyi cya Uganda yataye muri yombi na Polisi azira kwivugana umwana we w’imyaka 15 wari umunyeshuri amushinja kwiba moto akayigurisha nyamara abaturanyi b’uyu muryango bagahamya ko uyu mugabo yihekuye mu gusibanganya ibimenyetso kuko asanzwe azwiho ubusinzi bukabije.

Nyakwigendera Christian David Tebandeka wivuganywe n’ababyeyi be ku wa mbere tariki 19 Gashyantare 2018, yigaga mu mwaka wa gatatu w’amashuri yisumbuye ku kigo cy’amashuri cya Sacred Heart Kiteredde.

PNG - 970.2 kb
Nyakwigendera Christian David Tebandeka wivuganywe n’ababyeyi be yashyinguwe n’abanyeshuri bagenzi be


Bivugwa ko ababyeyi be bamukubise bamuziza moto ya Se yibwe muri uru rugo aho bakekaga ko ashobora kuba azi uburyo yibwemo cyangwa ariwe wayibye akayigurisha nyamara abaturanyi b’uyu muryango bo bakavuga ko uyu mugabo ukunze kurangwa n’ubusinzi ashobora kuba ari we wayigurishije bityo akivugana umwana we agira ngo asibanganye ibimenyetso ko ariwe wayigurishije akayinywera.

Uyu mwana ngo yavuye ku ishuri ku wa Gatandatu aho yari yatse uruhushya rumwohereza iwabo mu rugo kuzana ibikoresho bimwe mu byo yaburaga, ageze iwabo nibwo ku Cyumweru iyi moto ya Se yibwe.

Bimwe mu binyamakuru byo muri Uganda byanditse iyi nkuru bivuga ko Se w’uyu mwana ngo yaratashye asanga moto ye yamaze kwiba ahita yadukira umwana aramuhondagura atekereza ko ashobora kuba yayigurishije cyangwa akaba afite amakuru yose y’uburyo iyi moto yibwemo.

Bro Charles Kagoye, Umuyobozi w’iri shuri Tebandeka yigagaho yavuze ko uyu mwana uretse kuba yaratse uruhushya agiye kuzana ibikoresho iwabo ariko nta bundi burwayi buzwi yari afite ari naho bahera bemeza ko yishwe n’izi nkoni yakubiswe n’umubyeyi we.

Komanda wa Sitasiyo ya Polisi ya Kyotera, Musa Kayongo yavuze ko umwe mu baturanyi b’uyu muryango yahamagaye Polisi ayimenyesha urupfu rw’uyu mwana ‘Tabandeke’.

Yagize ati “Nyuma y’abantu benshi bampamagaye bambwira iby’urupfu rw’uriya mwana nahise nohereza itsinda ry’abapolisi mu iperereza aho bahise bajyana umurambo ku bitaro bya Kaliizo aho abaganga bahise bemeza ko umwana yakubiswe akavira imbere kugeza apfuye”.

Polisi kandi ikomeje gukora iperereza ku bijyanye n’amakuru yagiye atangwa na bamwe mu baturanyi b’uyu muryango bavuga ko uyu mugabo wivuganye umwana we ashobora kuba ari we wagurishije Moto bityo agashaka uburyo asibanganya ibimenyetso byamuviriyemo kwivugana umwana we ubwo yamuhondaguraga avuga ko ariwe wayigurishije.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo