Uko imitwe ya politiki yakiriye imyanya yabonye mu matora y’abadepite

Amatora y’abadepite bashya yasojwe abagore baje ku isonga bangana na 67%, ku mashyaka amwe imyanya iragabanuka mu gihe hari ayashoboye guhagararirwa mu Nteko Ishinga Amategeko bwa mbere mu mateka yayo.

Nyuma y’amajwi y’agateganyo yatangajwe kuri uyu wa Mbere tariki 4 Nzeri, amatora y’uyu mwaka yandikiwemo amateka kuko ari bwo bwa mbere amashyaka atavuga rumwe n’ubutegetsi abonye imyanya mu Nteko, mu myaka 24 nyuma ya Jenoside yakorewe Abatutsi.

Nibwo bwa mbere kandi amashyaka 11 yemewe mu Rwanda yose agiye guhagararirwa mu Nteko.

Komisiyo y’amatora yatangaje ko Umuryango FPR Inkotanyi n’amashyaka yifatanyije nawo wakomeje kuza ku isonga n’amajwi y’agateganyo 74%, bivuze ko wegukanye intebe 40 muri 53 zihatanirwa n’imitwe ya politiki n’abakandida bigenga.

Green Party na PS Imberakuri nk’amashyaka atavuga rumwe na leta, buri rimwe ryabonye amajwi 5% arihesha intebe ebyiri mu Nteko, PL ibona imyanya 4, PSD ibona imyanya 5.

Nubwo FPR Inkotanyi yabonye imyanya myinshi mu Nteko, yagabanutseho umwe ugereranyije na manda y’Umutwe w’Abadepite icyuye igihe; PSD yatakaje ibiri naho PL itakaza umwe.

Komiseri mu muryango FPR Inkotanyi akaba n’umuvugizi wayo, Gasamagera Wellars yabwiye IGIHE ko bishimiye umubare w’abadepite babonye kandi ko icyo bifuzaga bakigezeho.

Yagize ati “Twabyakiriye neza kandi ni umuco dusanganywe ujyanye na demokarasi, abaturage bagaragaje amahitamo yabo.Twashakaga ubwiganze busesuye mu Nteko kandi twabubonye, turashimira abanyarwanda bongeye kudushyigikira.”

Gasamagera yavuze ko kuba batakaje umwanya umwe mu Nteko bitazahungabanya uruhare rwabo mu gutanga ibitekerezo, avuga ko impamvu byabayeho ari uko hari abandi bashya binjiyemo kandi bishimangira demokarasi.

Ati “Bivuze ko demokarasi y’u Rwanda ibaye ubukombe kuko iha urubuga abantu batandukanye bagatanga ibitekerezo byabo. Bigaragaza ko ntawe uzapfana ingingimira avuga ko yabuze aho acisha ibitekerezo bye.”

Perezida w’ishyaka PSD, Dr Vincent Biruta yavuze ko ibyavuye mu matora babyakiriye neza.

Nubwo iri shyaka ryatakaje imyanya ibiri ugereranyije no muri manda ishize, Dr Biruta avuga ko nta kibazo biteye kuko mu matora byose bishoboka.

Yagize ati “Nta mpungenge byaduteye kuko mu gihe cy’amatora imyanya ishobora kuzamuka cyangwa ikamanuka, ubwo tuzicara dusuzume impamvu, kandi si natwe twenyine imyanya yagabanyutse hari n’abandi, kubera ko hari abashya binjiye mu nteko.”

Biruta avuga ko kuba hari amashyaka mashya yinjiye mu Nteko bigaragaza ko urubuga rwa politiki mu Rwanda rufunguye.

Ku muyobozi w’Ishyaka Riharanira Demokarasi no Kurengera Ibidukikije, Dr Frank Habineza, byari ibyishimo bikomeye kuko ishyaka rye ryinjiye mu Nteko Ishinga amategeko bwa mbere mu mateka yaryo.

Iri shyaka ryashinzwe mu 2009 ariko ntiryabasha guhatana mu matora y’abadepite yabaye mu 2013. Mu mwaka ushize Dr Habineza yahataniye kuyobora igihugu ariko aratsindwa.

Yavuze ko ubu icyo bagiye gushyira imbere ari ugukora ubuvugizi ku byo bijeje abaturage ubwo biyamamazaga.

Ati “Ni intambwe nziza u Rwanda rwateye. Byari bimenyerewe ko FPR n’amashyaka bafatanyije, PL na PSD aribo bajya mu nteko ariko byahindutse, biratanga icyizere rero. Nta cyabuza ibyo twiyemeje kugerwaho, si akazi koroshye ariko tuzajya tubiganiraho n’indi mitwe ya politiki tuzasangayo.”

Habineza yavuze ko icyo bazaheraho bakorera ubuvugizi ari ukuvugurura itegeko ry’ubutaka, imisoro igakurwaho cyangwa ikagabanywa ndetse no guharanira ko ubutaka buba ubw’abaturage aho kubukodeshwa na leta.

Perezida wa PS Imberakuri, Mukabunani Christine, na we ishyaka rye rigiye guhagararirwa mu Nteko Ishinga amategeko ku nshuro ya mbere, yashimiye cyane Abanyarwanda babatoye n’abandi bose bagiye bafatanya n’abayobozi b’inzego z’ibanze mu kubakira.

Yakomeje avuga ko ‘icyizere bagiriye ishyaka rye, bazakizirikana bagashyira mu bikorwa ibyo bagiye babasezeranya mu kwiyamamaza’.

Mu badepite 80 batowe, hazaba harimo abagore 54 bangana na 67 %.

Uretse imyanya 24 yihariye ku bagore, mu badepite 40 ba FPR Inkotanyi harimo abagore 24, muri PSD harimo abagore babiri mu myanya itanu, PL ifite abagore babiri mu myanya ine naho PS Imberakuri ikagira umugore umwe mu myanya ibiri.

Abo biyongeraho na Maniriho Clarisse, umwe muri babiri batorewe guhagararira urubyiruko.

Green Party yo yabonye imyanya ibiri, irimo abagabo gusa.





Tanga igitekerezo kuri iyi nkuru



Igitekerezo