Ubwo Mugabe yasabwaga kwegura nari mfite ubwoba ko ashobora kwicwa-George Charamba

Uwahoze ari umuvugizi wa Perezida wa Zimbabwe, George Charamba yavuze ko ubwo uyu mukambwe yasabwaga kwegura yagize ubwoba ko abanya-zimabwe bashoboraga kwifata bakamwivugana binyuze mu kwigumura nk’uko byabaye muri Libya.

Mu cyumweru cya nyuma cy’ubutegetsi bwa Mugabe, yari afungishijwe ijisho aho yari mu rugo iwe, mu gihe abasirikare bari bamuhagaritse ku butegetsi bwe hagamijwe kumweguza.

Avugana n’ikinyamakuru kigenga cyo mu gihugu cyitwa Daily News site, George Charamba wahoze ari umuvugizi wa Mugabe yagize ati "Natangiye kubona imyigaragambyo ikaze mu gihugu cya Libya ubwo cyari kiyobowe na Muammar Kadaffi bityo ngira ubwoba ko no muri Zimbabwe byahaduka ugasanga biviriyemo Mugabe kuhasiga ubuzima nkuko Kadaffi byamugendekeye”.

Yibuka iminsi ya nyuma y’ubutegetsi bw’imyaka 37 bwa Mugabe, Charamba yavuze ko uwo musaza w’imyaka 93 yashakaga kurangiza neza Manda ye ariko nyuma bikaba ngombwa ko yeguzwa ku cyemezo cy’igisirikare cyanafashijwe n’imyigaragambyo y’abamaganaga ubutegetsi bw’uyu mukambwe.

PNG - 556.4 kb
Umukambwe Mugabe yifuzaga kurangiza Manda ye


Ubwo Mugabe yari afungiye mu nzu ye ya Blue Roof mansion, ibiganiro by’uburyo yava ku butegetsi byarimo biba hagati y’abasirikare b’abajenerali, abapadiri ba Katolika, abamushyigikiye muri politike n’intumwa z’igihugu cya Afrika y’epfo.

Charamba avuga ko abategetsi b’igisirikare bahaye amakuru ishyaka rye ko abantu barenga ibihumbi makumyabiri bari mu myigaragambyo, bahamagarira Perezida Mugabe kuva ku butegetsi kandi ko iyi myigaragambyo yanashoboraga kumusanga mu rugo iwe aho yari.

Charamba yakomeje kuvugana na Daily News agira ati "byarashobokaga kubera ko abasirikare bavugaga ko badashobora kurasa abaturage bari mu myigaragambyo bamagana ubutegetsi bwa Perezida ngo bamene amaraso”.

Uwahoze ari Perezida w’igihugu cya Libya, Muammar Kadaffi yafashwe nyuma aricwa mu mwaka wa 2011 bivuye ku midugararo y’abaturage dore ko yari amaze imyaka irenga 40 ku butegetsi.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo